Европски држави испорачаа медицинска опрема за Иран
Берлин, 31 март 2020 (МИА) - Европа испорача медицинска опрема за Иран во рамки на механизмот за размена Инстекс, кој е првпат употребен и овозможува избегнување на американските санкции, соопшти германското Министерство за надворешни работи.
- Франција, Германија и Велика Британија потврдија дека Инстекс успешно ја спроведе својата прва трансакција и овозможи извоз на медицинска опрема од Европа за Иран, се наведува во соопштението.
Министерството во Берлин нагласи дека производите се пристигнати во Иран и се работи на други испораки во рамки на овој механизам.
Не се соопштени детални податоци за опремата, ниту кои фирми се вклучени во трансакциите.
Механизмот Инстекс е формиран од Европејците во јануари 2019 година, со цел да се избегнат американските санкции против Иран.
Иран е тешко погоден од пандемијата на коронавирусот, од кој, според најновите податоци, се заразени околу 40.000 луѓе, додека 2.757 лица се починати. гт/
