Сараево, 20 август 2023 (МИА) - Босна и Херцеговина е единствената земја во Европа која нема дигитален телевизиски сигнал, иако на тоа се обврза и порано со Женевскиот договор, а парите за тоа се одамна обезбедени.

Проектот се уште е на втор план бидејќи со години е закочен на различни начини, од тоа што не можеше да се постигне договор кој ќе управува со опремата, до разни политички притисоци и обвинувања дека тендерите при изборот на носители на проектот не биле целосно достапни и транспарентни.

Рампата за дигитализација на ТВ сигналите во моментов ја спушти конзорциум кој поднел жалба бидејќи не му бил доделен договор за спроведување на процесот на дигитализација, објави „Независне новине“.

„Имаме средства за овој проект, тоа е 25 милиони конвертибилни марки плус ДДВ. Босна и Херцеговина прва го обезбеди и не беше во можност да го реализира. Комисијата при Министерството за врски и транспорт го оцени тендерот и даде предлог да го додели договорот. Но, поради жалбата на конзорциумот на кој не му беше доделен договорот, овој процес во моментов е во Апелација во БиХ“, неодамна изјави министерот за врски и транспорт на БиХ Един Форто, кој изрази надеж дека по решавање на спорот, земјата конечно ќе добие дигитален телевизиски сигнал. ссм/

фото: пиксабеј