Shkup, 9 dhjetor 2023 (MIA) - Një muaj e gjysmë para formimit të qeverisë kalimtare, tashmë dihet emri i kryeministrit të ri teknik. Këtë pozitë duhet ta marrë kryetari i Kuvendit Talat Xhaferi, ndërsa  Jovan Mitreski nga LSDM të jetë kryetar i Kuvendit deri në shpërbërjen e tij. Qeveria kalimtare pritet të votohet më 28 janar. Partitë politike po punojnë për ekipimin kadrovik të kësaj qeverie dhe njëkohësisht për programet dhe përzgjedhjen e kandidatëve për president, por edhe për përzgjedhjen e kandidatëve për deputetë për zgjedhjet e 24 prillit dhe 8 majit.

Xhaferi do të jetë kryeministër në Qeverinë e tretë kalimtare nga viti 2016 e tutje. Para tij kryeministra në të a.q. Qeveria e Përzhinos ishte Emil Dimitriev (2016) dhe ministri aktual i Punëve të Brendshme, Oliver Spasovski (2020). Sipas Ligjit për Qeverinë dhe marrëveshjen e vitit 2015, opozita propozon ministra për Punë të Brendshme dhe për Punë dhe Politikë Sociale, ndërsa në disa departamente ka edhe zëvendësministra shtesë.

Kryesia Qendrore e Bashkimit Demokratik për Integrim (BDI) në mbledhjen e djeshme në selinë e partisë vendosi që kryetari aktual i Kuvendit Talat Xhaferi të jetë kryetar teknik i Qeverisë së Republikës së Maqedonisë së Veriut nga 28 janari deri në zgjedhjen e Qeverisë së re. Në krye të Shtabit Qendror Zgjedhor për zgjedhjet e vitit 2024 është zgjedhur Fatmir Besimi, ndërsa kryetari i partisë, Ali Ahmeti, është i autorizuar që të vazhdojë bisedimet me partitë politike dhe të vendosë për koalicione të mundshme për zgjedhjet presidenciale dhe parlamentare.

Xhaferi, sërish, në një video-mesazh ka theksuar se për të është nder i veçantë që i është dhënë besimi nga autoritetet partiake për nominim në pozitën e radhës – kryeministër teknik në Qeveri në 100 ditët e fundit.

Dhe këtë funksion me respektin dhe përgjegjësinë e duhur do ta kryej unë si përgjigje ndaj mbështetjes së shprehur nga autoritetet partiake, e mbi të gjitha nga qytetarët e Republikës së Maqedonisë së Veriut, tha Xhaferi në një video-deklaratë.

LSDM-ja nesër do të mbajë seancën e Bordit Ekzekutiv të partisë në të cilën, sipas burimeve partiake, kryeministri Dimitar Kovaçevski do ta propozojë Jovan Mitreskin për kryetar të Kuvendit deri në shpërndarjen e tij.

VMRO-DPMNE ka reaguar duke theksuar se me emërimin e Talat Xhaferit kryeministër teknik, në Maqedoni po bëhet dualizimi i plotë.

"Xhaferi ose komandant Forina dezertoi nga Armata e Maqedonisë në vitin 2001 dhe iu bashkua UÇK-së. Po ashtu, publiku ka qenë dëshmitar i një sërë shkeljesh të procedurave parlamentare nga Xhaferi, si përdorimi i flamurit evropian për ligje që nuk kishin të bënin me rregulloren evropiane, vetëm kishin lidhje me krimet e BDI-së, mbyllja e dyerve të sallës plenare në mënyrë që deputetët e tjerë të mos paraqiten për diskutim në rendin e ditës, si dhe sjellje të pahijshme dhe fyerje të funksionarëve kuvendor", thuhet në kumtesën partiake të VMRO-DPMNE-së.

Partia opozitare kërkoi shfuqizimin e Qeverisë së Përzhinos, por LSDM-ja dhe BDI-ja nuk u pajtuan, duke theksuar se për këtë ishte tepër vonë.

Qeveria kalimtare zgjidhet njëqind ditë para zgjedhjeve. Sipas Ligjit për Qeverinë, kryeministri aktual fillimisht dorëzon dorëheqjen, të cilën Kuvendi duhet ta konstatojë. Kjo do të thotë dorëheqje e gjithë Qeverisë. Presidenti i shtetit ia beson mandatin kandidatit për kryeministër të përkohshëm për përbërjen e kabinetit. Qeveria zgjidhet nga Kuvendi me shumicën e votave nga numri i përgjithshëm i deputetëve.

Në Qeverinë kalimtare, ministrin e Punëve të Brendshme dhe ministrin e Punës dhe Politikës Sociale e propozon partia opozitare me numër më të madh deputetësh (VMRO-DPMNE). Me propozim të kryeministrit, Kuvendi emëron zëvendësministra shtesë për ministrat e Punëve të Brendshme dhe Punës dhe Politikës Sociale nga radhët e pushtetit (LSDM), por edhe nga opozita, në departamentet e financave, bujqësisë, shoqërisë informatike dhe administratës.

Mandati i Qeverisë kalimtare zgjat nga zgjedhjet deri në shpalljen e rezultateve përfundimtare të Komisionit Shtetëror të Zgjedhjeve për zgjedhjet për deputetë.

Detyra kryesore e Qeverisë kalimtare është organizimi i zgjedhjeve parlamentare të ndershme dhe demokratike.

Ministri teknik i Punëve të Brendshme do të mund të kryejë maksimumi 15 shkarkime ose sistemime, në një pozicion më të ulët ose më të lartë të bartësve të një pozicioni drejtues në Ministri. Nëse emëron drejtues të rinj, ai ka për detyrë të emërojë zëvendësit e tyre me propozimin e zëvendësministrit shtesë. Të dy kanë nënshkrime të lidhura. Nëse një akt nënshkruhet vetëm nga një person, ai nuk do të jetë i vlefshëm. Ministri ka të drejtë të punësojë njerëz për nevojat e kabinetit të tij. Mund të kryejë gjithashtu dislokime horizontale të punonjësve.

Kjo do të jetë qeveria e tretë kalimtare në vend. I pari udhëhiqej nga Emil Dimitriev dhe për shkak se nuk mund të formohej një Qeveri për një kohë të gjatë, ai drejtoi qeverinë teknike nga 18 janari i vitit 2016 deri më 1 qershor të vitit 2017. Qeveria e dytë kalimtare u drejtua nga ministri aktual i Punëve të Brendshme, Oliver Spasovski, nga 3 janari 2020 deri më 30 gusht të vitit 2020.

Katër partitë politike më të mëdha më 2 qershor të vitit 2015 arritën marrëveshje 100 ditë para zgjedhjeve të ardhshme parlamentare me vendin të udhëheq Qeveria për zbatimin e zgjedhjeve.  sa/

Foto: Arkivi i MIA-s