Bruksel, 7 gusht 2024 (MIA) - Krijimi i grupit parlamentar Patriotët për Evropën (PFE) në Parlamentin Evropian tregon se kryeministri hungarez Viktor Orban është shumë më pak i izoluar në BE sesa mendohej më parë, vlerëson portali "Politiko" i Brukselit. 

Në komentin e portalit theksohet se krijimi i koalicionit të atyre që ndajnë qëllimin strategjik të Orbanit për të krijuar "Evropë të shteteve kombëtare" tregon se partitë e ekstremit të djathtë në BE janë më të harmonizuar për këtë vizion se kurrë më parë, duke sfiduar kështu drejtpërdrejt populizmin më pragmatik të krahut të djathtë që e promovon kryeministrja italiane Xhorxha Meloni. 

Orbani arriti të formojë një bllok që, përveç partisë së tij Fides dhe Tubimit Kombëtar Francez (RN) të Marine Le Pen, janë përfshirë edhe anëtarë të ish grupit të ekstremit të djathtë në PE, Identiteti dhe Demokracia (ID), duke përfshirë Partinë Holandeze të Lirisë (PVV) të Gert Vildersit, e cila u bë pjesë e Qeverisë së re të Holandës. 

"Megjithatë, kjo nuk do të ndryshojë plotësisht ekuilibrin e forcave në Parlament dhe nuk ka gjasa të ndikojë ndjeshëm në politikëbërjen e BE-së, të paktën për një periudhë afatshkurtër. Partitë e qendrës pro-BE mbajtën një shumicë të konsiderueshme në Bruksel. Së bashku me të Gjelbrit, ata siguruan lehtësisht vota të mjaftueshme për të rizgjedhur presidenten e Komisionit Evropian Ursula von der Lajen për mandat të dytë, si dhe për të mbështetur prioritetet e saj ligjdhënëse", bëhet e ditur në komentin. 

"Politiko", siç lajmëroi korrespondenti i MIA-s nga Brukseli, vlerëson se në situatën aktuale, grupi i PFE-së do të "mbetet në opozitë" me mundësi të kufizuar për të ndikuar në procesin legjislativ të BE-së dhe se, megjithëse për shkak të numrit të tij, do të financim dhe ndikim shtesë në procedurat parlamentare, megjithatë do t'i mohohet çdo përfaqësim i rëndësishëm në organet udhëheqëse, siç janë nënkryetarët parlamentarë dhe kryetarët e komiteteve. 

Por, sipas autorit të komentit, PFE paraqet "sfidë të drejtpërdrejtë në rrugën e tretë të populizmit konstruktiv" të Melonit, partia e Vëllezërve të Italisë (FDI) dhe aleati i saj kryesor në grupin e Konservatorëve dhe Reformistëve Evropianë (ECR), partia opozitare polake Ligj dhe Drejtësi (PiS), refuzuan t'i bashkohen bllokut të Orbanit. 

"Kjo do të thotë që Meloni, tani për tani, do të vazhdojë të lëvizë në terren midis të djathtës ekstreme dhe establishmentit të BE-së, derisa i mban të hapura të gjitha opsionet. Deputetët e saj tani po krijojnë ECR-në si urë lidhëse midis dy kampeve. Fakti që rritja e RN-së ishte e kufizuar në raundin e dytë të zgjedhjeve parlamentare franceze i jep Melonit arsye tjetër për të pritur dhe për të vazhduar të punojë në mënyrë konstruktive me Brukselin, Berlinin dhe Parisin për të çuar përpara prioritetet e Italisë", bëhet e ditur në komentin. 

Megjithatë, Meloni dështoi në ambiciet e saj që ECR-ja të bëhej grupi i tretë më i madh në Parlamentin Evropian, pasi partia spanjolle Voks vendosi të kalojë nga radhët e "konservatorëve" te "patriotët". 

Nga ana tjetër, për momentin, "patriotët" kanë vetëm një vend në Këshillin Evropian në imazhin e Orbanit, ndërsa anëtarët e grupit të tyre janë PVV-ja holandeze dhe Lidhja Italiane e Mateo Salvinit, të cilët janë partnerë të rëndësishëm në koalicionet qeveritare të vendeve të tyre, kështu që, sipas "Politiko", në njëfarë mënyre mund të kenë ndikim në qëndrimet që Haga dhe Roma i përfaqësojnë në Këshillin e BE-së. 

Sipas autorit të komentit, megjithatë, numri i "patriotëve" në Këshillin e BE-së ka të ngjarë të rritet në periudhën e ardhshme, sepse në disa zgjedhje kombëtare të planifikuara për muajt e ardhshëm, anëtarët e PFE-së kanë një shans të mirë për t 'u bërë pjesë e qeverive në vendin e tyre, siç është Austria, ku zgjedhjet e shtatorit pritet të fitohen nga Partia e Lirisë së Austrisë (FPO) ose Republika Çeke, ku në prag të zgjedhjeve të vjeshtës sondazhet tregojnë udhëheqjen e Aksionit nacionalist dhe populist të Qytetarëve të Pakënaqur (ANO) të ish-kryeministrit çek Andrej Babish.  

Meqë ra fjala, FPO dhe ANO, së bashku me Fides-in e Orbanit, janë tre partitë themeluese të grupit Patriotët për Evropën.  

"Zhvillimi i tillë do të përbënte rrezik për të minuar kohezionin e BE-së në fushat kryesore, mbi të gjitha buxhetin, zgjerimin dhe politikën e jashtme, veçanërisht kur bëhet fjalë për Ukrainën," shtohet në tekstin. 

Sipas "Politiko", BE deri më tani ka gjetur mënyra për të anashkaluar vetot e Orbanit lidhur me Ukrainën, por me një numër të madh të mundshëm të anëtarëve të ekstremit të djathtë në Këshillin Evropian, një praktikë e tillë do të ishte e vështirë për t'u zbatuar. 

Por autori i komentit, duke theksuar se disa nga partitë e krahut të djathtë mund të ndryshojnë retorikën e tyre nëse bëhen pjesë e qeverive, citon si shembull Melonin, kabineti i të cilës vazhdoi mbështetjen e fortë italiane për Ukrainën, kryeministrin sllovak Robert Fico, i cili nuk zbatoi njoftimet e tij për të pezulluar ndihmën ushtarake për Kievin dhe nuk përdori veton e tij në Këshillin Evropian, si dhe PVV-ja holandeze, e cila zbuti pozicionin e saj duke rënë dakord të vazhdojë mbështetjen e Holandës për Ukrainën si pjesë e marrëveshjes për të formuar koalicionin e ri qeveritar.

"Është e mundur që partitë e tjera të ekstremit të djathtë, miqësore me Rusinë, të bashkëlidhen në një mënyrë të ngjashme, por ekziston ende një rrezik i qartë i kompromentimit të kohezionit evropian, veçanërisht nëse ish-presidenti amerikan Donald Trump fiton zgjedhjet presidenciale në nëntor", konkludohet në komentin e "Politiko". 

foto: arkivi i MIA-s