Prilep, 18 shtator 2023 (MIA) - Në rajonin e Prilepit gjendja epidemiologjike është stabile, por po monitorohet nga afër virusi korona, intensiteti i të cilit do të rritet në periudhën e ardhshme, thotë Tatiana Murgoska Stanimiroviq, epidemiologe nga Qendra për Shëndet Publik në Prilep.

Shtatëmbëdhjetë për qind e të testuarve janë pozitivë, numri është rritur dhe për 14 ditë në shtator janë po aq sa në të gjithë gushtin.

"Me ardhjen e vjeshtës, pritet një rritje e intensitetit të qarkullimit të virusit SARS-COV 2, që mund të përfaqësojë një rrezik të shtuar për shëndetin, mbi të gjitha, për të moshuarit dhe për personat me sëmundje kronike. Edhe pse OBSH shpalli fundin e pandemisë në maj, virusi vazhdon të qarkullojë në popullatë dhe variantet e pranishme tani janë pasardhës të llojit omikron, i cili në vetvete ishte më i dobët në krahasim me llojet e mëparshme. Aktualisht në të gjitha vendet evropiane është vënë re tendenca e rritjes së rasteve të reja të shkaktuara nga varianti eris, por në vendin tonë ende qarkullojnë dy variante të reja të llojit omikron. Që nga fillimi i këtij muaji kemi një rritje të ndjeshme të numrit të pacientëve të rinj. Kështu, nga data 1 deri më 14 shtator janë rreth 300 raste të reja, që krahasuar me qershorin, korrikun dhe gushtin kur janë regjistruar nga 20 deri në 30 raste të reja, që paraqet një rritje të ndjeshme. Pritet sekuenca gjenetike e virusit, e cila do të tregojë se cilat variante janë të përfshira. Në fqinjësi qarkullojnë viruset eris dhe pirola. Në rajonin tonë që nga fillimi i muajit shtator janë regjistruar 10 raste të reja, për dallim nga fakti se gjatë gjithë muajit gusht janë regjistruar 13 ndërsa në qershor dhe korrik gjithsej 3 raste. Ky numër prej 10 të sapo regjistruarve në shtator, sipas numrit të të testuarve është 17 për qind. Në muajt e vjeshtës pritet një intensitet i shtuar i qarkullimit të virusit", shpjegon epidemiologia Murgoska Stanimiroviq.

Nuk ka nevojë për panik dhe për grupet e rrezikut dhe të sëmurët kronikë rekomandohet një dozë vaksinë.

"Shumica e njerëzve e kanë kaluar virusin, qoftë pa simptoma, qoftë me simptoma, por me kalimin e kohës imuniteti i fituar në mënyrë natyrale apo pas vaksinimit dobësohet, ulet. Kështu, variantet e reja mund ta anashkalojnë atë imunitet, veçanërisht nëse ai dobësohet. Prandaj, në periudhën e ardhshme për personat e grupeve të rrezikuara dhe personat me sëmundje kronike, edhe pse kanë pasur KOVID-19 ose janë vaksinuar, rekomandohet të vaksinohen me një dozë vaksinë dhe konsiderohet të jetë mbrojtje e mjaftueshme. Jemi duke monitoruar situatën, presim rekomandime për periudhën e ardhshme. Nuk ka nevojë për panik, këto variante të omikronit shkaktojnë një pasqyrë klinike më të lehtë. Nga sa dimë nga të sapo infektuarit, më së shumti janë të pranishme problemet e sipërme të frymëmarrjes, djegie në fyt, në hundë, plogështi, temperaturë rreth 37-38 gradë. Aktualisht nuk kemi asnjë pacient të shtruar dhe nuk kemi të dhëna për komplikime. Sido që të jetë, situata nuk duhet nënvlerësuar dhe do të monitorohet nga afër", thotë Tatjana Murgoska Stanimiroviq, epidemiologe në Qendrën për Shëndet Publik, Prilep.

Me fillimin e vitit shkollor pritet një rritje e sëmundjeve infektive akute respiratore, e cila pritet për këtë periudhë të vitit. sa/

Foto: MIA