Shkup, 28 mars 2025 (MIA) - Dinamika e zbatimit të agjendës së reformave nga Plani për Rritje për vendin është e mirë, por jo e mjaftueshme, vlerësoi ministri për Çështje Evropiane Orhan Murtezani në prezantimin e sotëm të masave nga Plani i Rritjes për Ballkanin Perëndimor dhe Agjenda e Reformave 2024-2027 për Maqedoninë e Veriut në konferencën e përbashkët për shtyp në Qendrën për media të qeverisë me shefin e delegacionit të Bashkimit Evropian në Shkup, Mihalis Rokas.

Murtezani në përgjigje të pyetjes së një gazetari theksoi se sipas agjendës së reformave të miratuar në Bruksel, për të gjitha reformat që nuk zbatohen brenda afatit të caktuar, hyn në fuqi një periudhë automatike grejs prej 12 muajsh, por theksoi se kjo nuk duhet të jetë rrethanë lehtësuese për ne, sepse për çdo periudhë ka reforma shtesë dhe nëse nuk do t'i zbatojmë më kohë ato do të mblidhen, që në fund do të nënkuptonte, thotë, se ne nuk do t'i realizojmë me sukses.

"Deri më tani nuk ka një fidbek të tillë nga procesi i zbatimit. Për mendimin tim si koordinator kombëtar, procesi i zbatimit është i kënaqshëm, por duhet të forcohet më tej, sepse nëse deri në dhjetor kishim vetëm pesë hapa reformash, deri në qershor i kemi 16, dhe deri në fund të vitit 45. Plus, nuk është vetëm Agjenda e Reformës, ka procese të tjera që janë subjekt i reformave në vend, ndaj të gjitha duhet të shkojnë paralelisht dhe të respektohen afatet kohore"; theksoi Murtezani.

I pyetur nëse është e mundur nëse vonohen me reformat, këto mjete nga Plani i Rritjes, në total prej 750,4 milionë euro, të na hiqen, duke pasur parasysh përvojën e përdorimit të fondeve IPA, Murtezani theksoi se që në fillim të mandatit të tij, ka apeluar për forcimin e kapaciteteve të vendit për përdorimin e fondeve IPA, dhe se nëse nuk angazhohemi me hapa konkretë, e njëjta gjë mund të ndodhë edhe me Agjendën e Reformës së Planit të Rritjes.

"Unë si ministër kam një agjendë për realizimin e këtyre aktiviteteve dhe kjo i tejkalon problemet që kishim me IPA-në. Tani për tani kemi një sinjal të qartë se dinamika e zbatimit është vërtet e mirë, por nuk mjafton, pasi numri i reformave duhet të rritet.

I pyetur se ku mendon se po ngecim më shumë me reformat, në cilin institucion dhe cila është hallka më e dobët, Murtezani tha se në sektorin e gjyqësorit reformat po ecin pak më vështirë, më ngadalë dhe se shpreson se do të fitojnë dinamikë. ls/ 

Foto: Ministria për çështje evropiane