Mexhiti nga Tirana: Pas 22 viteve sollëm ndryshimin te shqiptarët e Maqedonisë së Veriut
- Zëvendëskryeministri i parë dhe ministër i Mjedisit Jetësor dhe Planifikimit Hapësinor, Izet Mexhiti mori pjesë në Konferencën e ambasadorëve në Tiranë, të organizuar nga Ministria për Evropë dhe Punë të Jashtme e Republikës së Shqipërisë ku prezent ishin politikanë shqiptarë nga vendet e rajonit.
- Post By Fami Bajrami
- 14:15, 27 gusht, 2024
![Mexhiti nga Tirana: Pas 22 viteve sollëm ndryshimin te shqiptarët e Maqedonisë së Veriut](https://mia.mk/images/20240827141535_big_730x400_49.webp )
Tiranë, 27 gusht 2024 (MIA)- Zëvendëskryeministri i parë dhe ministër i Mjedisit Jetësor dhe Planifikimit Hapësinor, Izet Mexhiti mori pjesë në Konferencën e ambasadorëve në Tiranë, të organizuar nga Ministria për Evropë dhe Punë të Jashtme e Republikës së Shqipërisë ku prezent ishin politikanë shqiptarë nga vendet e rajonit.
Gjatë panelit me temë “Hapësira shqiptare në gjeopolitikën e rajonit”, zëvendëskryeministri i parë Mexhiti ndau pikëpamjet mbi zhvillimet e fundit në skenën politike të Maqedonisë së Veriut, ku theksoi rëndësinë e ndryshimit të shumëpritur që solli krijimi i qeverisë pa BDI-në, një parti që për 22 vjet kishte monopolizuar politikën shqiptare, ndërsa partitë maqedonase ndryshoheshin vazhdimisht, duke nënvizuar se BDI-ja kishte ngulfatur skenën politike dhe pengonte çdo përpjekje për ndryshime pozitive për shqiptarët.
Mexhiti tha se integrimi evropian mbetet prioriteti absolut i koalicionit dhe shprehu përkushtimin dhe gatishmërinë për votimin e ndryshimeve kushtetuese në çdo moment.
Zëvendëskryeministri i parë përgëzoi ministrin Igli Hasani për krijimin e një departamenti të veçantë në Ministrinë e Jashtme të Shqipërisë, dedikuar shqiptarëve të rajonit dhe diasporës, duke shtuar se thellimi i bashkëpunimit brendashqiptar është një domosdoshmëri që duhet të vazhdojë pandërprerë.
Mexhit nënvizoi nevojën e krijimit të një platforme të përbashkët bashkëpunimi në fusha të ndryshme, nga arsimi deri te ekonomia, duke e cilësuar këtë si një element përcaktues për të ardhmen tonë të përbashkët evropiane.
Mexhiti sot dhe nesër do të takohet me krerët e shtetit shqiptarë.