Jerusalem, 19 nëntor 2025 (MIA) - Një marrëveshje sigurie midis Izraelit dhe Sirisë nuk do të nënshkruhet në të ardhmen e afërt, publikoi sot gazeta "Tajms of Izrael", duke cituar një zyrtar të lartë izraelit të paidentifikuar.

"Nuk jemi ende afër. Nuk është ende në tryezë," tha ai.

Pika kryesore e mosmarrëveshjes gjoja është kërkesa e Sirisë që ushtria izraelite të tërhiqet nga territori sirian, në të cilin hyri pas rrëzimit të ish-liderit sirian Bashar al-Assad një vit më parë.

Më parë, transmetuesi publik izraelit Kan publikoi se bisedimet për një marrëveshje të mundshme sigurie janë në qorrsokak.

Presidenti sirian Ahmed al-Shara, gjatë takimit me presidentin amerikan Donald Tramp në Shtëpinë e Bardhë javën e kaluar, komentoi "ftohtësisht" mbi mundësinë e normalizimit të marrëdhënieve të Sirisë me Izraelin.

Kur u pyet për anëtarësimin e mundshëm të Sirisë në Marrëveshjet e Abrahamit me Izraelin, Al-Shara vuri në dukje se situata në Siri është e ndryshme nga ajo e nënshkruesve të tjerë, pasi vendi ndan një kufi me Izraelin, i cili, siç vuri në dukje, ka pushtuar Lartësitë e Golanit që nga viti 1967.

"Ndoshta administrata e Trampit mund të na ndihmojë të arrijmë një marrëveshje sigurie me Izraelin ose të kthehemi te marrëveshja e vitit 1974", tha ai. ls/

Foto: Arkivi i MIA-s