Prishtinë, 4 korrik 2023 (MIA) - Kryeministri i Luksemburgut, Ksavier Betel, i cili së bashku me homologun e tij holandez, Mark Rute, sot ndodhet në Kosovë, deklaroi se vendi i tij dhe Bashkimi Evropian mbështesin dialogun ndërmjet Kosovës dhe Serbisë dhe tha se askush nuk duhet të jetë fitues nëse ka konflikt mes dy vendeve, njoftoi korrespondenti i MIA-s nga Prishtina.

Në një konferencë për shtyp pas takimit me kryeministrin e Kosovës, Albin Kurti, Betel tha se kjo vizitë ishte planifikuar shumë kohë më parë dhe se ai dhe Rute nuk kanë ardhur në rajon për të gjykuar, por për të dëgjuar palët dhe për të ndihmuar në gjetjen e nje zgjidhje.

"Kur u planifikuar ky udhëtim, nuk e dinim që do të kishte tensione. Ne përpiqemi të ndërtojmë ura. Dje ishim në Beograd, sot jemi në Prishtinë. Është e rëndësishme për ne që e dimë se ekziston një udhërrëfyes (nga BE-ja) për dialogun. Ne duhet të eliminojmë çdo mundësi për kriza të mundshme, nga të cilat njerëzit vuajnë më shumë. Ne si politikanë marrim vendime, por njerëzit i vuajnë pasojat", tha Betel.

Kryeministrat e Luksemburgut dhe Holandës kanë mbërritur në Prishtinë nga Beogradi, ku dje janë takuar me presidentin e Serbisë, Aleksandar Vuçiq.

Vizita e tyre në të dy vendet, siç thanë ata, synon të kontribuojë në qetësimin e tensioneve dhe normalizimin e marrëdhënieve ndërmjet Kosovës dhe Serbisë.

Para takimit me Kurtin, Rute dhe Betel u pritën nga presidentja e Kosovës, Vjosa Osmani, ndërsa pasdite njoftuan se do të takohen me organizatat joqeveritare që mbështesin komunitetin LGBTI. ls/