Shkup, 27 qershor 2025 (MIA) - Në Samitin e Ballkanit Perëndimor për dixhitalizimin që do të mbahet më 1 dhe 2 tetor në Shkup do të prezantohet aplikacioni i Maqedonisë për letërnjoftim dhe patentë shoferi dixhital. Nga ajo ditë forma elektronike e këtyre dokumenteve do të jetë një test version dhe çdo qytetar do të mund ta shkarkojë.

"Version elektronik i letërnjoftimitt dhe patentë shoferit dhe të gjitha shërbimet do të zhvillohen këtu. Është një portofol elektronik siç njihet në Bashkimin Evropian, një alternativë për njerëzit që të mos mbajnë dokumente personale me vete dhe do të jenë në gjendje t'i mbajnë ato në një version elektronik. Greqia është një shembull i shkëlqyer dhe pjesa tjetër e vendeve të Ballkanit janë ende shumë prapa nesh", tha sonte ministri i Transformimit Dixhital Stefan Andonovski në Ditarin e TV Sitel.

Pas miratimit të paketës së ligjeve për transformimin dixhital nga axhenda e reformave sot në Kuvend, Andonovski theksoi se kjo është një punë serioze dhe se pas një diskutimi të plotë, janë miratuar zgjidhje ligjore cilësore në nivel evropian dhe të harmonizuara me legjislacionin e BE-së për transformimin dixhital.

Andonovski theksoi në intervistë se portali uslugi.gov.mk është në zhvillim të vazhdueshëm me gjithnjë e më shumë shërbime të reja për qytetarët dhe se numri i përdoruesve po rritet gjithashtu, duke arritur në 6300. Ai është i kënaqur, tha që ky portal për shërbime elektronike tani përdoret edhe nga institucionet, duke treguar gjykatat që pranojnë të gjitha vërtetimet, si për shembull për mosdënim.  Ai njoftoi se sistemi elektronik për lëshimin e certifikatave nga Drejtoria për Udhëheqjen e Librave Amë do të mbyllet në mënyrë që të mos ketë dy paralele si më parë, në mënyrë që certifikatat të lëshohen vetëm përmes portalit uslugi.gov.mk. Për funksionalitet dhe ndërveprim më të madh me përdoruesit, ai njoftoi shërbimin "Kutia Elektronike", e cila do të jetë adresa e portalit ku përdoruesit do të marrin të gjitha informacionet dhe njoftimet.

Lidhur me mundësinë e kryerjes së një regjistrimi elektronik të popullsisë, të cilin e trajtoi sot edhe kryeministri Hristijan Mickoski në përgjigje të pyetjes së një gazetari, ministri Andonovski theksoi se "kemi kapacitet ta kryejmë atë" dhe se programi i Qeverisë përfshin një regjistrim dixhital që do të kryhet në vitin 2026.

"Jemi të vetëdijshëm për mangësitë e regjistrimit të vitit 2021, për të cilin paralajmëruam që atëherë se metodologjia nuk ishte e mirë dhe kjo tani është demonstruar me vendimin e Gjykatës Kushtetuese. Prandaj, në fillim të prillit, na u ngarkua nga Qeveria të formojmë një grup pune për të diskutuar se cilat kushte duhet të krijohen për një regjistrim dixhital në vitin 2026", tha Andonovski.

Ai theksoi se për këtë qëllim, do të punohet aktivisht për pastrimin e bazave të të dhënave të institucioneve të tjera për të bërë përgatitje të mira në mënyrë që një regjistrim dixhital i popullsisë të mund të kryhet që në vitin 2026 në vend të periudhës së rregullt prej dhjetë viteshsh.

"Objektivi është viti 2026. Ne duam të rivendosim besimin e qytetarëve në sistem. Dhe pavarësisht nëse do të zbatohet atëherë apo rregullisht në vitin 2031, duhet të jemi të përgatitur", shtoi ministri, duke treguar Slloveninë si një shembull të një vendi që ka "një mjet të shkëlqyer dixhital për kryerjen e regjistrimit të popullsisë". sa/

foto: printskrin/ TV Sitel