Strugë, 30 maj 2024 (MIA) - Ambasadori evropian Dejvid Giri sot mori pjesë në hapjen e Shtëpisë Evropiane në Strugë, objekti i gjashtë që Bashkimi Evropian po e hap në vend.

"Rrjeti i shtëpive evropiane po zgjerohet në të gjithë vendin, është shumë aktiv në promovimin e vendeve për brezat e rinj. Shtëpitë evropiane paraqesin një investim për të rinjtë e këtij vendi, në inovacion, në krijimtarinë e tyre dhe të ardhmen e tyre evropiane, këtu në Maqedoninë e Veriut. Në shtëpitë tona evropiane vetëm vitin e kaluar janë organizuar më shumë se 900 aktivitete dhe ngjarje,  me pjesëmarrjen e mbi 36 mijë të rinjve", theksoi Giri në ceremoninë me rastin e dorëzimit të objektit në përdorim. 

 Ai u bëri thirrje të rinjve nga Struga dhe rrethina që ta vizitojnë Shtëpinë Evropiane, se dyert e saj janë të hapura, duke i porositur që të vijnë dhe ta shndërrojnë atë vend në një qendër për të gjithë të rinjtë në të cilën do të promovohen vlerat e përbashkëta evropiane.

 "Struga e promovon gjuhën universale të poezisë që nga viti 1960. Mbi trashëgiminë kulturore të lënë nga vëllezërit Miladinovci, përmes Mbrëmjeve Strugane të Poezisë, këtu kanë qenë mysafirë shumë nga poetët më të njohur të të gjitha kohërave, duke paraqitur vlera identike, pavarësisht se nga kanë ardhur. Pikërisht, poezia ajo që është një katalizator i fuqishëm për dialogun dhe paqen. Shtëpia Evropiane në Strugë udhëhiqet nga të njëjtat parime, për t'i bashkuar të rinjtë, për t'i ndihmuar të shkëmbejnë ide, t'i përmirësojnë aftësitë dhe të promovojnë të menduarit dhe qasjet inovative, dhe më e rëndësishmja, të bashkohen drejt një të ardhmeje më të mirë", u tha ambasadori evropian të rinjve të pranishëm në hapjen e Shtëpisë Evropiane në Strugë.

Aktivitetet e Girit në Strugë vazhduan me zbulimin e muralit "Simbioza" të financuar nga BE-ja në Muzeun e Natyrës "Dr. Nikolla Nezllobinski". Të rinjtë nga Struga më pas patën mundësinë të shoqërohen me bashkëmoshatarët e tyre përmes një ngjarje të rrjetëzimimit në ambient të hapur.

"Jurop Haus" Strugë e mbajti ngjarjen e saj të parë më 21 mars të vitit 2024, në Ditën Botërore të Poezisë. Me këtë rast në bashkëpunim me Mbrëmjet Strugane të Poezisë është ripërtërirë çmimi "Struga e Re". 

Rritja e rrjetit "Jurop Haus " në vend filloi në Shkup në nëntor të vitit 2019, vazhdoi në Kriva Pallankë dhe Strumicë në shkurt të vitit 2021, në Manastir dhe Veles në maj dhe qershor të vitit 2023. Pas Strugës, rrjeti do të rrumbullaksohet këtë vit me hapjen e një objekti të tillë në Tetovë, i planifikuar për javën e ardhshme. 

Foto: MIA