Скопје,17 октомври 2024 (МИА) - Третата фестивалска вечер во Драмски театар во Скопје е резервирана за гостите од Босна и Херцеговина. Со претставата „Целосно странци“ театарот „Камерни 55“ настапува на фестивалот РУТА.

Темелена на истоимениот филм на италијанскиот режисер Паоло Ѓеновезе ансамблот на Сараевскиот театар ја направи претставата минатата сезона и веќе се задоволни од одзивот на публиката за оваа репертоарска комедија,  истакна на конференцијата за новинари, директорот на Камерни 55, Сенад Алихоџиќ. Режијата е на Лајла Каикчија.

Во претставата седуммина пријатели, кои собрани на вечера се дружат носејќи ги своите тајни во мобилните телефони, се плашат со едно мало невнимание, она што го сметаме само наше да не излезе на виделина. Улогите ги играат: Сабит Сејдиновиќ, Ванеса Глоѓо, Албан Укај, Сенад Алихоџиќ, Дина Мушановиќ, Надине Мичиќ и Игор Скварица 

Пандан на гостинската претстава е претставата „Странци“ во продукција на Драмски театар Скопје која веќе седма сезона се игра на матичната сцена и на многу гостувања и фестивали 

Како што најавуваат од Драмски театар, по вечерашнава изведба на претставата  тие очекуваат голем интерес на публиката за тркалезната маса на која за двете продукции на претставите ќе разговараат актерите на претставата „Целосно странци“ на Камерни 55 и домаќините, актерите на  „Странци“ од Драмски. ад/