Скопје, 6 април 2026 (МИА) - Владата работи со сите „стекхолдери“ за доаѓање до конечна верзија на законот за заштита од пушење. Не е во ред децата од најмала возраст да користат ароматизирани вајпови, кои потоа може да се трансформираат во нешто друго - истакна денеска премиерот Христијан Мицкоски.

Одоварајќи на новинарско прашање по пуштањето во употреба на целосно реконструираните шест операциони сали на хируршките клиники во клиничкиот центар „Мајка Тереза“, тој појасни дека увозниците се правдале со тоа дека ќе има шверц со таканаречените вајпови од соседните земји.

- Значи, сега не е од едно лошо, алтернативата ни е друго лошо. Не е тоа суштината на оваа реформа. Ние велиме дека секој може да си продава она што треба да си го продава, но треба да има јасно правило како сето тоа ќе функционира. Не можеме тие барања, ние ајде да дозволиме и понатаму ароматизирани вајпови да се користат, и децата на 11-12 години да ги користат. Тоа не е во ред. Тоа е она што ние не сакаме да биде во законот, а тие велат да има еден-два вкуса, ментол да имало. Не е ова шведска маса - малку од ова сакам, малку од она, или правиме холистички пристап, пристап со кој ќе направиме нешто, или подобро да оставиме вака да биде како што е сега, без контрола, па да видиме до кај ќе стигнеме. Се разбира дека второто не е решение. Се разбира дека првото ќе е решение и мора да имаме рамка. Не може така - нагласи Мицкоски. 

Тој забележа дека постојниот закон има селективна или никаква примена, што, според премиерот, е рецидив од минатото, кој сакаат да го канализираат.

- Се пуши каде што не треба да се пуши. И тука разговаравме со ХОРЕКА-групацијата, хотелите, рестораните, клубовите и тука веќе имаме некакво решение. Но, исто така во врска со производителите и увозниците, ќе се сложите дека има сè повеќе имаме примери на малолетници, кои користат и употребуваат таканаречени вајпови, со вкусови - истакна Мицкоски.

Министерот за здравство Азир Алиу посочи дека стратегијата на Владата е сите закони да ги работат синхронизирано и со сите „стекхолдери“ во државата. 

- Тоа го направивме и со овој закон. Ние имавме неколку состаноци на работно ниво со работните групи, но и на политичко ниво во целата процедура беше вклучен и премиерот. Постојано се координираме и синхорнизираме со сите владини и невладини институции и бизнис-заедницата. Законот е при крај. Денеска го имам последниот состанок за дополнително да се синхронизираме од правна гледна точка. И ценам дека оваа недела или наредната ќе биде дел од владините процедури - изјави Алиу. сс/вг/

Фото МИА