Kiev, 26 dhjetor 2025 (MIA) - Presidenti ukrainas Volodimir Zelenski do të diskutojë çështjet territoriale, një pengesë e madhe në bisedimet e paqes, me homologun e tij amerikan Donald Tramp në Florida të dielën, ndërsa një plan paqeje prej 20 pikash dhe një marrëveshje për garancinë e sigurisë i afrohen finalizimit.

Duke njoftuar marrëveshjen, Zelenski tha se "shumë gjëra mund të vendosen para Vitit të Ri", ndërsa Uashingtoni vazhdon përpjekjet e tij për t’i dhënë fund pushtimit rus të Ukrainës, konfliktit më vdekjeprurës në Evropë që nga Lufta e Dytë Botërore.

"Sa i përket çështjeve të ndjeshme: do të diskutojmë si për Donbasin ashtu edhe për centralin bërthamor Zaporozhje. Sigurisht, do të diskutojmë edhe për çështje të tjera", u tha ai gazetarëve në UatsAp.

Rusia dëshiron që Ukraina të tërhiqet nga pjesë të rajonit lindor të Donjeckut që forcat e saj nuk arritën t’i kapnin gjatë luftës gati katërvjeçare. Moska dëshiron kontroll të plotë të rajonit të Donbasit, i cili kufizohet me rajonet e Donjeckut dhe Luganskut. Nga ana tjetër, Kievi dëshiron që luftimet të ndalen në mënyrë që të ngrijë situatën aktuale në front.

SHBA, e cila po përpiqet të gjejë një kompromis, ka propozuar krijimin e një zone të lirë ekonomike në territorin që Ukraina do ta braktisë përfundimisht. Ende nuk është e qartë se si do të funksionojë kjo zonë në praktikë.

Zelenski tha se çdo kompromis mbi territorin duhet të vendoset nga populli ukrainas në një referendum të mundshëm. Centrali bërthamor i Zaporozhjes, më i madhi në Evropë, ndodhet në fushën e betejës dhe operohet nga forcat ruse.

Zelenski shtoi se qëllimi i takimit me Trampin ishte të "nivelizonte gjërat" mbi propozimet dhe të diskutonte marrëveshjet e mundshme që lidhen me ekonominë ukrainase. Ai tha se nuk ishte gati të thoshte nëse do të nënshkruhej një marrëveshje gjatë vizitës së tij, por se Ukraina ishte e hapur për të.

Marrëveshja mbi garancitë e sigurisë midis Ukrainës dhe SHBA-së është "pothuajse gati" dhe 90 përqind e draftit të planit 20-pikësh është përfunduar, shtoi presidenti ukrainas. sa/

foto: EPA