Uashington, 16 shkurt 2026 (MIA) - I dërguari i posaçëm Stiv Uitkof dhe dhëndri i presidentit amerikan Donald Tramp, Xhared Kushner, do të vizitojnë Gjenevën këtë javë për të diskutuar për programin bërthamor të Teheranit me negociatorët iranianë, konfirmoi sot Shtëpia e Bardhë.

Një zyrtar amerikan ka konfirmuar se dy deputetët, të cilët janë negociatorët kryesorë të Donald Trampit me Iranin, do të përfaqësojnë Uashingtonin gjatë bisedimeve.

Ministri iranian, Abas Aragçi, do të përfaqësojë Teheranin, njoftoi më parë ministria e tij. Ai do të takohet gjithashtu me homologët e tij zviceranë dhe omanë, si dhe me drejtorin e përgjithshëm të Agjencisë Ndërkombëtare të Energjisë Bërthamore.

Sipas Teheranit, këto bisedime indirekte do të zhvillohen nesër me ndërmjetësimin e Sulltanit të Omanit.

Teherani dhe Uashingtoni rifilluan bisedimet në Muskat, kryeqytetin e Omanit, më 6 shkurt, muaj pasi bisedimet e mëparshme u pezulluan në qershor të vitit të kaluar për shkak të luftës 12-ditore midis Iranit dhe Izraelit, e shkaktuar nga sulmet izraelite ndaj objekteve bërthamore dhe ushtarake të Republikës Islamike. Shtetet e Bashkuara gjithashtu kanë bombarduar objektet bërthamore iraniane.

Bisedimet e reja vijnë pasi Uashingtoni kërcënoi Teheranin me ndërhyrje ushtarake pas shtypjes brutale të protestave masive në Iran.

Pas bisedimeve me Iranin, Uitkof dhe Kushner pritet të marrin pjesë në negociatat midis Rusisë dhe Ukrainës të udhëhequra nga SHBA-ja në Gjenevë. ls/

Foto: Arkivi i EPA-s