Uashington, 29 dhjetor 2025 (MIA) - Presidenti amerikan Donald Tramp sot në Florida do ta presë kryeministrin izraelit Benjamin Netanjahun për të biseduar mbi fazën e ardhshme të planit paqësor të Trampit për Gazën.

Armëpushimi në Rripin e Gazës hyri në fuqi më 10 tetor, pasi Izraeli dhe Hamasi ranë dakord për një "udhërrëfyes" prej 20 pikash, të mbështetur nga Uashingtoni, për të përfunduar luftimet që kanë zgjatur më shumë se dy vjet.

Megjithatë, realizimi i fazës së dytë të planit, sipas të cilës Hamasi duhet të dorëzojë armët dhe të shpërndahen forca ndërkombëtare për stabilizim (ISF), pritet të jetë shumë më i komplikuar. Hamasi deri tani ka refuzuar të gjitha thirrjet për çarmatim.

Trampi dhe Netanjahu, të cilët do të takohen në Mar-a-Lago për herë të gjashtë këtë vit, gjithashtu pritet të diskutojnë për Iranin, për të cilin Izraeli pretendon se po rinovon rezervat e tij të raketave pas sulmeve të ndërsjella në fillim të këtij viti. Të dy liderët do të bisedojnë edhe për Libanin dhe Sirinë, ku SHBA-të janë një ndërmjetës i rëndësishëm në përpjekjet e Izraelit për të arritur marrëveshje sigurie me fqinjët e tij veriorë.

Netanjahu do të shoqërohet nga prindërit e pengut të fundit izraelit, trupat e të cilit ende ndodhen në Gazë. Si pjesë e marrëveshjes për armëpushim, Hamasi ka rënë dakord të lirojë të gjithë pengjet e kapura gjatë sulmit terrorist të 7 tetorit të vitit 2023, në këmbim të të burgosurve palestinezë.

Sipas marrëveshjes, faza e dytë e planit paqësor do të hyjë në fuqi vetëm pasi të gjithë pengjet, të gjallë dhe të vdekur, të kthehen në Izrael. qa/

Foto: DPA