Gostivar, 23 dhjetor 2025 (MIA) - Me një tubim në Qendrën Kulturore në Gostivar mbrëmë filloi fushata zgjedhore e koalicionit Aleanca Kombëtare për Integrim (AKI). Para anëtarësisë dhe mbështetësve të partisë, kandidati për kryetar komune, Valbon Limani, shprehu mirënjohje për të gjithë qytetarët që i dhanë besimin në rrethin e parë të zgjedhjeve lokale në tetor. Në fjalimin e tij, ai shprehu besimin se vullneti i qytetarëve do të realizohet dhe do të triumfojë në këto zgjedhje. Fitorja e tij, tha ai, u anulua nga numri i votave.

"Kjo nuk është hera e parë që në Gostivar zhvillohen dhe provohen 'lojëra', por jam i bindur se me mbështetjen tuaj dhe mbi të gjitha me vullnetin e Zotit, do të kemi sukses. Ky proces është një betejë për dinjitet dhe për të drejtën e qytetarëve për të vendosur vetë për të ardhmen e Gostivarit", tha Limani.

Në fjalimin e tij theksoi se nuk beson në premtime boshe zgjedhore dhe se angazhimi i tij politik bazohet në projekte konkrete dhe të realizueshme, të cilat, siç tha ai, duhet të mundësojnë zhvillim të qëndrueshëm të qytetit dhe një jetë më të mirë për qytetarët. Kandidati për kryetar komune i mbështetur nga AKI kërkoi mbështetjen e bashkëqytetarëve dhe bëri thirrje për pjesëmarrje masive në qendrat e votimit më 11 janar, me qëllim që, siç tha ai, të konfirmohet vullneti i popullit të Gostivarit.

Kryetari i BDI-së, Ali Ahmeti në fjalimin në tubim, theksoi se koalicioni në Gostivar ka vetëm një kandidat për kryetar komune - Valbon Limani. 

"Ke mbështetjen time të plotë, mbështetjen e BDI-së dhe të të gjitha strukturave tona në Gostivar. Fitorja jote është e sigurt. Gostivarit i duhet një brez i ri politikanësh", tha Ahmeti.
 

Kryetari i Aleancës për Shqiptarët, Arben Taravari, shprehu besimin se Valbon Limani do të fitojë bindshëm në zgjedhjet e 11 janarit dhe bëri thirrje për mobilizim maksimal në rrethin e dytë. Duke folur për situatën aktuale politike, Taravari tha se vitin e ardhshëm në Maqedoni do të mbahen zgjedhje të parakohshme parlamentare.

Kryetari aktual në këshillin komunal dhe lider i degës së Gostivarit të BDI-së, Valdet Xhaferi në tubim e theksoi rëndësinë e bashkëpunimit ndërmjet institucioneve lokale për zbatimin e projekteve në interes të qytetarëve. fc/

Foto: MIA