Пронајдена црната кутија на бродот со хемикалии кој тоне кај Шри Ланка
Коломбо, 6 јуни 2021 (МИА) - Лоцирана е црната кутија на бродот полн со хемикалии и пластика што тоне на брегот на Шри Ланка, соопштија денеска официјални лица, додека истражителите се обидуваат да утврдат што го предизвикало пожарот во пловниот објект.
Снимачот за податоци за патување (ВДР), познат и како поморска црна кутија, им овозможува на истражителите да ги прегледаат процедурите и упатствата пред несреќа.
Властите во Шри Ланка соопштија дека се надеваат дека ВДР ќе обезбеди детали за движењата на бродот и неговите комуникации со пристаништето во главниот град Коломбо, каде требаше да се пристигне.
„Морнарицата им дозволи на техничарите да го отстранат ВДР од мостот што сè уште е над морското ниво”, изјави портпаролот на морнарицата Индика де Силва.
Товарниот брод „X-Прес Перл“, регистриран во Сингапур, полека тоне во Индискиот океан од средата, откако гореше скоро две недели.
Бродот, кој превезуваше 25 тони азотна киселина и огромна количина пластични суровини, пловеше за Коломбо во Индија.
Властите се подготвуваат за можно излевање нафта по потопувањето, но засега нема знаци на истекување.
Еколозите од Шри Ланка во петокот ги тужеа владата и бродските оператори затоа што не ја спречиле „најголемата поморска катастрофа“ во историјата на земјата. паг/
