Скопје, 30 јуни 2025 (МИА) - Министерството за земјоделство, шумарство и водостопанство (МЗШВ) информира дека денеска е објавен Јавниот повик 08/2025 за доставување на барање за исплата на средства од Програмата за финансиска поддршка на рурален развој за 2025 година - наменет за надомест на трошоци за одржување на висински пасишта и ливади и поддршка на традиционално сточарство, со цел зачувување на руралните подрачја и промовирање на одржливо земјоделство.

Право на поддршка имаат земјоделски стопанства регистрирани согласно Законот за земјоделство и рурален развој во Единствениот регистар на земјоделски стопанства при Министерството за земјоделство, шумарство и водостопанство.

Висина на поддршката е 100% од исплатената просечна нето-плата во период од 1 јануари 2024 година до 31 декември 2024 година, како трошок за чување и напасување на добитокот (овци, кози и/или говеда) на пасишта и ливади, односно регистрирани одгледувалишта кои се наоѓаат во населени места со надморска висина еднаква или повисока од 700 метри или 60% од исплатената просечна нето-плата во период од 1 јануари 2024 година до 31 декември 2024 година, како трошок за чување и напасување на добитокот (овци, кози и/или говеда) на пасишта и ливади, односно регистрирани одгледувалишта кои се наоѓаат во населени места со надморска висина пониска од 700 метри.

Услови за доделување се едно вработено лице на 150 овци; едно вработено лице на 100 кози; едно вработено лице на 50 говеда, но не повеќе од 620.000 денари по вработено лице и задржување на истиот број вработени најмалку една година по исплатата.

Барањата со потребната документација потребно е да се поднесат најдоцна до 30.07.2025 година.

Мерката, како што информираат од МЗШВ е дел од континуираните напори на Владата за поддршка на руралниот развој и зачувување на традиционалното сточарство во планинските подрачја на нашата земја. аа/вј/

Фото: МИА архива