Њујорк, 24 септември 2024 (МИА) - Претседателот на САД Џо Бајден денеска го одржа својот последен говор на дебатната сесија пред светските лидери на Генералното собрание на Обединетите нации,

- Ова е четврти пат како имам голема чест да зборувам пред ова собрание како претседател на Соединетите Американски Држави, рече Бајден. - Ова ќе биде мојот последен. Сум бил сведок на неверојатни историски промени.

Бајден го отвори својот говор на Генералното собрание на Обединетите нации со потсетување на конфликтите што беснееја низ светот кога првпат стапил во јавната служба пред повеќе од 50 години, вклучувајќи ја и војната во Виетнам.

Споменувајќи го помирувањето меѓу САД и Виетнам, Бајден рече: „Работите можат да се подобрат. Никогаш не треба да го заборавиме тоа. Го имам видено тоа во текот на мојата кариера.“

Ова искуство, заедно со други на кои Бајден сведочел во неговата долга кариера, го прави уверен дека светот ќе помине низ уште еден тежок период, и покрај бројните кризи. - Како лидери, немаме луксуз да реагираме со очај, додаде Бајден.

Американскиот претседател, исто така, се обврза да продолжи да ја поддржува Украина додека не победи во нејзината војна против Русија. Од почетокот на војната пред повеќе од две години, Бајден истакна дека „нашите НАТО сојузници и партнери, заедно со 50 плус нации, застанаа против Русија“.

Тој предупреди дека не смее да се намали поддршката за Украина, спомнувајќи го предизвикот со иднината на поддршката од САД, особено ако поранешниот претседател Доналд Трамп повторно ја преземе функцијата и ги намали средствата за помош на Украина.

Бајден изрази загриженост и за убивањето на невини цивили од двете страни во конфликтот меѓу Израел и Газа. Тој истакна дека стотици цивили биле убиени за време на нападот на Хамас врз Израел, и дека илјадници невини луѓе биле убиени и во Газа, вклучувајќи хуманитарни работници.

Во својот говор, Бајден нагласи и дека неговата администрација презема чекори за борба против климатските промени, гладот и за искористување на технологијата, вклучително и вештачката интелигенција. Тој предупреди дека вештачката интелигенција носи длабоки ризици, вклучувајќи дезинформации и биолошки оружја.

Во завршниот дел од неговиот последен говор пред Генералното собрание, Бајден се осврна на неговата одлука да се откаже од кампањата за реизбор претходно ова лето. - Да се ​​биде претседател беше најголема чест во мојот живот, рече Бајден. Има уште многу нешта што сакам да ги завршам, посочи Бајден

- Но, колку и да ја сакам мојата работа, повеќе ја сакам мојата земја. Решив дека, по 50 години јавна служба, време е новата генерација на лидери да ја одведе мојата нација напред, истакна претседателот на САД.

И по години на одржување говори за важноста на демократијата и за клучниот момент кој, според него, светот го достигнал, Бајден ги повика своите колеги - светските лидери да ги стават своите народи над сопствените амбиции. - Мои колеги лидери, никогаш да не заборавиме дека некои работи се поважни од останувањето на власт. Вашиот народ е она што е најважно, рече тој.

- Никогаш да не заборавиме, тука сме за да му служиме на народот, а не обратно. Бидејќи иднината, иднината ќе биде освојувана од оние кои ќе го отклучат целиот потенцијал на својот народ да дише слободно, да мисли слободно, да иновира, да се едуцира, да живее и да љуби отворено без страв. Тоа е душата на демократијата, додаде Бајден. - Таа не припаѓа на ниту една земја, поентираше американскиот претседател. ссм/

фото: ЕПА