Shkup, 7 tetor 2025 (MIA) - Ministri i Punëve të Brendshme, Pançe Toshkovski, reagoi përmes një postimi në Fejsbuk ndaj asaj që ai e quajti "sulme të dëshpëruara, të pabaza dhe të motivuara politikisht" nga LSDM-ja, duke deklaruar se përmes kërkesave të vazhdueshme për dorëheqjen e tij po përpiqen të mbulojnë dështimin e tyre dhe frikën nga përgjegjësia. 

"Në ditët e fundit, kemi qenë dëshmitarë të një vale tjetër sulmesh të dëshpëruara, të pabaza dhe të motivuara politikisht nga LSDM-ja ndaj meje. Sinqerisht, e kuptoj se dëshpërimi është i madh kur çdo anketë e re shkrin mbështetjen e tyre më shpejt sesa ata arrijnë të shpikin një gënjeshtër të re, por kjo histeri që po shohim nuk është një debat politik, por dëshpërim i maskuar si një deklaratë. Ka kaluar më shumë se një vit në të cilin aktiviteti i përditshëm i qendrës së shtypit të LSDM-së nuk është gjë tjetër veçse një përsëritje si papagall i fjalëve: 'Dorëheqje për Toshkovskin!' Çdo ditë, e njëjta fjali, i njëjti intonacion. Duket sikur kanë marrë një udhëzim se pavarësisht temës, përgjigjja duhet të jetë 'dorëheqje'. Një ditë është siguria, një ditë tjetër mjedisi, të tretën ngrohja në ndërtesë. Nuk do të habitem nëse LSDM-ja del me një deklaratë urgjente nesër se unë jam personalisht përgjegjës për mungesën e dritës së diellit në Shkup. Për ta, çdo temë është e mirë, vetëm nëse mund të paketohet në fjalën 'dorëheqje'", theksonToshkovski.

Sipas Toshkovskit, budallallëqe të tilla tregojnë vetëm sa e humbur është partia, e cila nuk ka argumente dhe përpiqet të krijojë skandal nga çdo rast i vetëm. Ne shohim të njëjtin model në përpjekjet për të treguar se anëtarë të MPB-së drejtuan mbledhjet e partisë në komitetet lokale.

"Ky nuk është shqetësim për institucionin, është frikë nga një institucion që më në fund nuk është nën komandën e tyre. Kur nuk mund të gjejnë një të metë të vërtetë, e shpikin atë. Dhe kur ndodh një ngjarje e vërtetë, si incidenti i sotëm me të shtëna në Kumanovë, ata menjëherë e shndërrojnë atë në një dozë të re histerie politike. Para se të përfundojë hetimi, para se të shfaqen gjetjet fillestare, ata tashmë kërkojnë dorëheqjen. Për ta, çdo ngjarje tragjike është një mjet për llogaritje politike dhe në vend që të tregojnë të paktën një humanitet dhe respekt minimal për një moment, ata menjëherë vrapojnë para kamerave. Kjo nuk është shqetësim për shtetin, kjo është dëshpërim i maskuar si politikë, thuhet në postimin e Toshkovskit.

Dhe derisa ata aktrojnë shqetësim, vazhdon Toshkovski në publikimin e tij, realiteti është krejt ndryshe. 

"Është e qartë se shumë gjëra i shqetësojnë, veçanërisht fakti që institucionet më në fund po funksionojnë dhe drejtësia po troket në derën e tyre. Ndaj me këtë rast, do të doja t'i pyesja publikisht:

• Aq shumë ju pengon  që ne nisëm procedura penale kundër gjykatësve dhe prokurorëve të korruptuar?
• Aq shumë ju pengon që ne pastruam 14 banda kriminale që ishin të përfshira në drogë, trafikim qeniesh njerëzore dhe vrasje të rënda, pikërisht derisa ministri i Punëve të Brendshme ishte një njeri nga LSDM?
• Aq shumë ju pengon që ne arrestuam anëtarë të celulave terroriste?
• Aq shumë ju pengon që ne ngritëm kallëzime penale kundër një ish-ministri të Kulturës, një ish-drejtori të EMV-së, një ish-drejtori burgu, ish-kryetarë komunash, drejtorësh të korruptuar të shëndetësisë dhe institucioneve të tjera shtetërore që menduan se kjo qeveri do të vazhdonte ta mbështeste atë njësoj si ju, dhe jo të luftonte krimin dhe korrupsionin?", pyet Toshkovski.

Është e qartë, shton Toshkovski në reagimin e tij ndaj LSDM-së, nuk është mënyra se si punoj unë që ju shqetëson, por rezultatet e asaj pune, sepse më në fund pas jush, MPB  nuk është një mjet për arritjen e interesave të ngushta partiake dhe të biznesit të individëve të lidhur me qeverinë, por një instrument për zbatimin e ligjit.

"Dhe pikërisht për këtë arsye nuk jam i befasuar që po i koordinoni përsëri sulmet tuaja. Unë jam ministri i parë në historinë e Maqedonisë që i ka mbijetuar dy interpelancave brenda një viti - një nga E majta dhe një nga BDI. Natyrisht, e vetmja gjë që mungon për të kompletuar këtë 'koalicion të pazakontë' është që LSDM të bashkohet me interpelancën e saj të tretë. Pra, pas një viti e gjysmë kërkesash të vazhdueshme për dorëheqje, do të ishte politikisht korrekte që të gjithë ju më në fund të qëndroni në të njëjtën anë, të paktën në dëshpërim, dhe të paraqisni një interpelancë të tretë që do të jetë një shans tjetër për të krahasuar tetë vitet tuaja të kaosit dhe shkatërrimit të sistemit me një vit e gjysmë rezultatesh të matshme", thekson ai.

Ministri Toshkovski është i vendosur se nuk do të japë dorëheqjen, por përkundrazi, do të vazhdojë të zgjidhë problemet.

"Unë nuk do të jap dorëheqje, përkundrazi, ndërsa ju merreni me spine dhe ndërtime, unë do të vazhdoj të zgjidh probleme dhe të pastroj rrëmujën që latë pas. Për ju, politika është një shfaqje, për ne është një përgjegjësi. Dhe kjo, të dashur, është ndryshimi midis një qeverie që shkatërron dhe një brezi që ndërton. Për rreth dhjetë ditë, në zgjedhjet lokale, do ta shihni rezultatin e 'dorëheqjes' suaj më të zhurmshme. Ai do të jetë momenti kur fjalët do të përplasen me veprat dhe qytetarët do të thonë se kush punoi dhe kush vetëm përhapte panik dhe histeri", përfundon Toshkovski në publikimin në të cilin reagon ndaj thirrjeve të LSDM-së për dorëheqjen e tij. 

Foto: Arkivi i MIA-s