Shkup, 28 mars 2025 (MIA) - Tetë pacientë të rinj të lënduar nga zjarri në Koçan nga klinikat e Shkupit lëshohen për mjekim shtëpiak, ndërsa nëntë po kthehen nga jashtë, njoftoi sot në konferencë për shtyp ministri i Shëndetësisë Arben Taravari.

Sipas tij, në klinikat në Shkup do të mbesin vetëm 14 pacientë, ndërsa në mjekim jashtë vendit 91 pacientë. Tetë pacientët që duhet të mbërrijnë sot, tre nga Hungaria, dy nga Italia dhe nga një nga Athina, Beogradi dhe Suedia, sipas protokolleve të Shtabit të Krizave, do të qëndrojnë në klinikat e Shkupit për të paktën 24 orë për kontrolle shtesë. Një paciente nga Bullgaria, shpjegoi, tashmë ndodhet në një hotel dhe shkon vetëm për ekzaminime.

"Edhe për katër pacientët në gjendje kritike marrim lajme të mira, se edhe pse janë ende në gjendje të rëndë, janë në një gjendje të përmirësuar krahasuar me ditën e djeshme. Optimist se edhe ata do të fillojnë të përmirësohen, se nuk do të ketë komplikime të tjera. Disa parametra laboratorikë tregojnë se ka përmirësim", tha Taravari.

Ai paralajmëroi se nesër duhet të kthehen dy pacientë të rinj, një nga Lituania dhe një nga Suedia dhe ndërkohë mund të merret vendim edhe për të tjerë.

Në Klinikën e Toksikologjisë, shtoi ministri, janë gjashtë pacientë, dy në kirurgjinë plastike, gjashtë në spitalin e vjetër të qytetit, pesë në “8 Shtatori” dhe tre në spitalin privat “Sistina”.

Drejtori i Klinikës së Toksikologjisë, Andon Çibishev, sqaroi se gjashtë pacientët që aktualisht janë në Klinikë janë ata që dje janë kthyer nga mjekimi jashtë vendit dhe se të gjitha analizat toksikologjike kanë qenë brenda vlerave referente.

Taravari edhe një herë ka ritheksuar se mjekimi i pacientëve nga zjarri i Koçanit në vend dhe jashtë vendit është falas.

"Po e përsëris se trajtimi është falas për të gjithë pacientët. Për të gjithë pacientët për dy anëtarët të familjes është siguruar një biletë aeroplani ose nëse udhëtojnë me mjete të tjera transporti dhe akomodimi. Qeveria mbulon të gjitha shpenzimet e të gjithë pacientëve që nga mjekimi, qëndrimi i prindërve dhe transporti i pacientëve dhe prindërve në të dy drejtimet. Gjithçka është plotësisht e mbuluar, ka konfirmuar Taravari.

Ministria nuk kishte një vlerësim financiar se sa do të kushtonte procesi i trajtimit të pacientëve jashtë vendit, por Taravari theksoi se pacientët nuk do të paguajnë asnjë denar. Nëntëdhjetë e nëntë për qind të shpenzimeve, sipas tij, mbulohen nga vendet që kanë ndihmuar dhe një përqindje e vogël do të mbulohet nga Fondi i Shëndetësisë.

Lidhur me mangësitë e sistemit shëndetësor në vend, ai theksoi se në botë nuk ekziston një sistem shëndetësor ideal, por se përkundër mangësive të trashëguara, kanë arritur ta menaxhojnë relativisht mirë situatën me pacientët e prekur nga zjarri në Koçan, duke theksuar se 11 ditë pas tragjedisë nuk ka pasur të vdekur. Ai theksoi se javën e ardhshme do të nisin testimet 200-250 specializantë, 1200 infermiere dhe staf tjetër ndihmës, ndërsa kanë munduar edhe rreth 100 autoambulanca.

"Kjo situatë na ka treguar se Qendra Klinike duhet të integrohet. Dhe prandaj së shpejti do të insistoj, në koordinim me të gjithë faktorët relevantë politikë, që së paku të fillojmë me kirurgjinë, dhe pastaj e gjithë Qendra Klinike të jetë një njësi. Do të ishim shumë më mirë të organizuar nëse do të kishim një dirigjent sesa dhjetë”, përfundoi Taravari.

Lidhur me hapjen e qendrës së djegieve, tha se ka biseduar me drejtorin e “8 Shtatorit” që kovid-qendra të riorientohet, por për këtë duheshin burime njerëzore shtesë.

Ministri bëri me dije se sot kanë nënshkruar marrëveshje me dy sindikatat e shëndetësisë për koeficientin e pagesës së pagave, çështje për të cilën kanë negociuar edhe në vitin 2017. ls/

Foto: Printskrin