Shkup, 8 nlntor 2024 (MIA) - Ministri i Politikës Sociale, Demografisë dhe Rinisë, Fatmir Limani, gjatë vizitës dyditore në Turqi, në kuadër të Samitit të VI. Ndërkombëtar për Gratë dhe Drejtësinë, ka zhvilluar një takim dypalësh me Ministrin e Familjes dhe Politikave Sociale të Republikës së Turqisë, Mahinur Ozdemir Gjoktash.

Siç informojnë nga Ministria e Politikës Sociale, Demografisë dhe Rinisë, takimi i dy ministrave ishte një mundësi për të diskutuar disa çështje që janë në kompetencë të dy ministrive, me shkëmbimin e përvojave pozitive që do të nënkuptonin përmirësimin e politikave dhe praktikës aktuale.

"Të dy vendet kanë bashkëpunim afatgjatë në fushat që i mbulojnë dhe këtë e vërtetojnë marrëveshjet e lidhura për bashkëpunim në fushën e punës, sigurimeve sociale dhe punësimit, si dhe Deklarata e nënshkruar e synimeve për bashkëpunim në fushën e   politikës sociale, ku janë përfshirë çështje që lidhen me shërbimet sociale për familjen, gratë, fëmijët, të moshuarit dhe personat me aftësi të kufizuara", thonë nga Ministria e Politikës Sociale, Demografisë dhe Rinisë.

Maqedonia dhe Turqia, shtojnë prej aty, po zbatojnë me sukses Marrëveshjen e Sigurimeve Sociale, me të cilën qytetarët nga RMV-ja dhe Turqia ushtrojnë të drejtat e tyre nga sigurimi dhe kujdesi shëndetësor, sigurimi pensional dhe invalidor, duke përfshirë të drejtën për pensionin  e pleqërisë, të drejtën për pension invaliditeti, të drejtën e pensionit familjar, ushtrimin e të drejtës së sigurimit në rast aksidenti në punë dhe sëmundjes profesionale, të drejtën e sigurimit në rast papunësie dhe shtesë për fëmijët.

Ministri Limani theksoi se investimi i Republikës së Turqisë në Republikën e Maqedonisë së Veriut është i një rëndësie të madhe, duke pasur parasysh se do të krijojë vende të reja pune dhe do të përmirësojë gjendjen demografike të vendit. Në takim u diskutua edhe për politikat rinore që Ministria mbulon në drejtim të krijimit të mundësive për të rinjtë dhe mbajtjes së tyre në vend, si dhe përfshirja e kategorive të rrezikuara të qytetarëve, fëmijëve, personave me aftësi të kufizuara, romët. Duke vepruar kështu, u theksua rëndësia e familjes si thelbi bazë në shoqëri, dhe si rrjedhim rëndësia e politikave që synojnë mbështetjen e familjeve.

Palët e theksuan përkushtimin e tyre për forcimin e bashkëpunimit dhe kjo do të konfirmohet me nënshkrimin e një Memorandumi të ri Bashkëpunimi ndërmjet dy ministrive për fushat nën juridiksionin e tyre. bsh/

Foto: Ministria e Politikës Sociale, Demografisë dhe Rinisë