Shkup, 13 tetor 2025 (MIA) - Kandidatja për kryetare të Qytetit të Shkupit, Kaja Shukova, sot në një tribunë publike kushtuar zhvillimit dhe të ardhmes së Çarshisë së Vjetër të Shkupit, theksoi se ruajtja e trashëgimisë kulturore dhe integrimi i traditës me jetën moderne urbane do të jetë një nga prioritetet e saj, njoftoi LSDM.

"Çarshia nuk është vetëm një atraksion turistik, është një organizëm i gjallë, një vend i zejtarëve, kulturës, artit dhe bashkimit. Qëllimi ynë është t'i rikthejmë autenticitetin, t'i japim jetë të re përmes rivitalizimit inteligjent urban dhe ekonomik", tha Shukova. 

 Ajo paralajmëroi se si kryetare e Shkupit do të angazhohet për: mbështetje sistematike për artizanët dhe bizneset e vogla në çarshi, përmirësimin e infrastrukturës dhe ambientit urban, një strategji të qartë për turizëm të qëndrueshëm dhe ofertë kulturore, ruajtjen e arkitekturës autentike dhe parandalimin e uzurpimeve.

"Çarshia e  Vjetër do të jetë një vend ku tradita dhe moderniteti bashkohen. Besoj në një Shkup që respekton të kaluarën e tij, por që ecën me guxim përpara", shtoi Shukova. 

Në tribunë morën pjesë artizanë, arkitektë, punonjës kulturorë dhe qytetarë, të cilët e mirëpritën iniciativën për të rikthyer frymën e çarshisë dhe përfshirjen e tij më të madhe në jetën kulturore dhe turistike të qytetit. 

 Foto: LSDM