Uashington, 6 nëntor 2024 (MIA) - Reagime nga mbarë bota pasi "Foks njuz" shpalli fitoren e parashikuar të republikanit Donald Tramp në shtetin e Pensilvanisë.

"Urime për presidentin e sapozgjedhur të Shteteve të Bashkuara të Amerikës. Zoti ju bekoftë", shkroi presidenti i El Salvadorit, Naib Bukele në "X".

Kryeministri i Hungarisë, Viktor Orban i cili ka mbështetur hapur përpjekjet e ish presidentit Tramp për t'u kthyer në Shtëpinë e Bardhë shkroi në Fejsbuk se Trampi është "rrugës drejt një fitoreje të bukur".

Lideri i partisë së Lirisë së ekstremit të djathtë në Holandë, Gert Uilders madje në “X” shkroi: “Uroj presidentin Tramp! Urime Amerikës! Mos u ndalni, vazhdoni të luftoni dhe të fitoni zgjedhjet!”.

Ministrat izraelitë të ekstremit të djathtë Itamar Ben-Gvir dhe Becalel Smotriç përshëndetën fitoren e pritur të Trampit.

Foto: EPA