Uashington, 3 prill 2025 (MIA) - Presidenti i SHBA-së, Donald Tramp, shpalli një seri tarifash të reja, duke përfshirë tarifën bazë prej 10 për qind për të gjitha vendet dhe tarifa shtesë, të synuara për disa vende me suficit të konsiderueshëm tregtar me Shtetet e Bashkuara, duke e cilësuar këtë lëvizje si një "kthim historik i politikës tregtare të SHBA-së në pavarësinë e tregtisë".

Këto masa, sipas tij, do të forcojnë industrinë vendase dhe do të rikthejnë vendet e punës në Shtetet e Bashkuara.

Tarifa prej 25 për qind për të gjitha automjetet e prodhuara jashtë Shteteve të Bashkuara hyri në fuqi mëngjesin e sotëm, më 5 prill (6:01 paradite me orën e Maqedonisë) – një tarifë bazë prej 10 për qind për të gjitha importet nga të gjitha vendet; më 9 prill në orën 6:01 të mëngjesit me orën e Maqedonisë – tarifa më të larta, reciproke për “shkelësit më të këqij”.

Nuk munguan reagimet e liderëve botërorë

Kryeministri australian Antoni Albaneze i quajti tarifat e reja doganore amerikane “plotësisht të pajustifikuara”, duke theksuar se ato do të ndryshonin perceptimin e marrëdhënieve mes SHBA-së dhe Australisë, përndryshe aleatë të ngushtë. Australia është goditur me një tarifë prej 10%, ndërsa ministrja e Jashtme Peni Uong paralajmëroi se këto masa do të kenë një ndikim të rëndësishëm në rajonin e rëndësishëm strategjik indiano-paqësor, duke shtuar se Australia do të përgjigjet me "seriozitet dhe pjekuri". Megjithatë, Albaneze theksoi se Kanberra nuk do të marrë kundërmasa, duke thënë: “Miqtë nuk reagojnë kështu”.

Kryeministri irlandez Mihol Martin tha se "nuk sheh asnjë justifikim" për tarifat e Trampit dhe njoftoi se Irlanda, së bashku me partnerët e saj në Bashkimin Evropian, do të shqyrtojnë se si të përgjigjen në një mënyrë proporcionale, duke mbrojtur interesat e kompanive, punëtorëve dhe qytetarëve evropianë. "Konflikti nuk i sjell dobi askujt," theksoi ai, duke shtuar se Irlanda do të nxiste zgjidhje që do të forconin lidhjet tregtare transatlantike.

Ministri britanik i Biznesit dhe Tregtisë Xhonatan Rejnols ka komentuar tarifat doganore prej 10% për importet nga Mbretëria e Bashkuar, duke thënë se qeveria është e fokusuar në negocimin e një marrëveshjeje ekonomike me Shtetet e Bashkuara që do të ruajë marrëdhëniet tregtare "të drejta dhe të balancuara". "SHBA-ja janë aleati ynë më i afërt," tha ai, duke shtuar se qasja duhet të mbetet e qetë, por se "asgjë nuk përjashtohet " dhe se qeveria do të mbrojë interesin kombëtar nëse është e nevojshme. "Askush nuk dëshiron luftëra tregtare, por ne kemi mjetet dhe nuk do të hezitojmë të veprojmë," paralajmëroi Rejnolds.

Presidentja zvicerane Karin Keller-Sutter njoftoi në platformën X se vendi do të "vendoste shpejt për hapat e ardhshëm" pasi SHBA vendosi tarifa 31 për qind ndaj mallrave zvicerane, duke e etiketuar Zvicrën një nga "shkelësit më të këqij". Në vitin 2024, Shtetet e Bashkuara eksportuan mallra në Zvicër me vlerë 25 miliardë dollarë, ndërsa importuan 63.4 miliardë dollarë, duke krijuar një deficit të madh tregtar. Administrata amerikane në raportin e saj vjetor e përshkroi Zvicrën si një vend proteksionist që përdor subvencione të larta, kufizime importi dhe tarifa për të mbështetur sektorin e saj bujqësor. "Interesat ekonomike afatgjata janë një prioritet, së bashku me respektimin e ligjit ndërkombëtar dhe tregtisë së lirë," shkroi Keller-Suter.

Kryeministri polak Donald Tusk njoftoi në X: "Miqësia nënkupton partneritet. Partneritet do të thotë tarifa reale dhe të vërteta reciproke. Duhen vendime të përshtatshme."

Kryeministrja italiane Xhorxha Meloni, e cila konsiderohet e afërt me presidentin amerikan Tramp, tha se tarifat e vendosura nga administrata e tij janë “të gabuara” dhe nuk do të përfitojnë Shtetet e Bashkuara.

“Ne do të bëjmë gjithçka që mundemi për të arritur një marrëveshje me SHBA-në në mënyrë që të shmangim një luftë tregtare që në mënyrë të pashmangshme do të dobësonte Perëndimin në dobi të lojtarëve të tjerë globalë”, tha Meloni në një postim në Fejsbuk.

Në çdo rast, shtoi ajo, si gjithmonë, ne do të veprojmë në interes të Italisë dhe ekonomisë së saj, duke bashkëpunuar me partnerët e tjerë evropianë. Ajo shprehu shpresën për bashkëpunim midis Evropës dhe Shteteve të Bashkuara për të shmangur përshkallëzimin.

Kryeministri suedez Ulf Kristerson tha se ata nuk duan një rritje të vazhdueshme të barrierave tregtare.

“Ne nuk duam një luftë tregtare. "Ne duam të gjejmë një mënyrë për t'u rikthyer në rrugën e tregtisë dhe bashkëpunimit me Shtetet e Bashkuara, në mënyrë që njerëzit në vendet tona të gëzojnë një jetë më të mirë," vuri në dukje ai.

Kryeministri spanjoll Pedro Sançez theksoi se "Spanja do të mbrojë kompanitë dhe punëtorët e saj dhe do të vazhdojë të jetë e përkushtuar ndaj një bote të hapur".

Ministri i Jashtëm danez Lars Loke Rasmusen tha në një deklaratë se ai nuk mund ta kuptojë pse Shtetet e Bashkuara donin të fillonin një luftë tregtare kundër Evropës.

"Askush nuk fiton, të gjithë humbasin. Në vend që të ndërtojmë mure, ne duhet të thyejmë barrierat. Evropa do të mbetet e bashkuar. Evropa do të japë përgjigje të forta dhe proporcionale," tha ai.

“Miq amerikanë, sot nuk është ditë çlirimi - është ditë pakënaqësie. Tarifat e Donald Trampit nuk mbrojnë tregtinë e ndershme, por e sulmojnë atë nga frika dhe dëmtojnë të dyja anët e Atlantikut. Evropa është e bashkuar, e gatshme për të mbrojtur interesat e saj dhe e hapur për bisedime të ndershme dhe të qëndrueshme”, theksoi Manfred Ueber, kryetari i partisë më të madhe në Parlamentin Evropian - Partisë Popullore Evropiane.

Kryeministri i ri kanadez Mark Karni pretendon se Trampi ka "ruajtur një numër elementësh të rëndësishëm" të marrëdhënieve tregtare midis Kanadasë dhe Shteteve të Bashkuara.

“Por tarifat e fentanilit mbeten ende në fuqi, ashtu si tarifat e çelikut dhe aluminit. Ne do t'i luftojmë këto tarifa me kundërmasa, do të mbrojmë punëtorët tanë dhe do të ndërtojmë ekonominë më të fortë në G7", tha kryeministri kanadez.

Carni tha gjithashtu se tarifat reciproke të Trampit "do të ndryshonin rrënjësisht sistemin ndërkombëtar të tregtisë".

Ministri i Tregtisë së Zelandës së Re Tod MekKlej tha se interesat e Zelandës së Re përfaqësohen më së miri nga një botë në të cilën tregtia rrjedh lirshëm.

“Marrëdhëniet dypalëshe të Zelandës së Re me SHBA-në mbeten të forta. Ne do të flasim me administratën për të marrë informacion shtesë dhe me eksportuesit tanë për të kuptuar më mirë ndikimin e këtij njoftimi," tha ai.

Presidenti i përkohshëm i Koresë së Jugut, Han Dak-su, theksoi se, duke u nisur nga ajo që lufta tregtare globale tashmë është bërë realitet, qeveria duhet të vendosë të gjithë kapacitetin e saj për të kapërcyer krizën tregtare.

Ai urdhëroi masa urgjente mbështetëse për kompanitë që do të goditen nga tarifat amerikane, 25 për qind, duke përfshirë edhe makinat dhe i kërkoi ministrit të industrisë të negociojë në mënyrë aktive me Uashingtonin për të zvogëluar ndikimin e tarifave doganore.

Ministria e Punëve të Jashtme braziliane tha se qeveria braziliane shpreh keqardhje për vendimin e marrë nga qeveria e Amerikës së Veriut, e cila vendos tarifa shtesë deri në 10 për qind për të gjitha eksportet braziliane.

“Qeveria po shqyrton të gjitha masat e mundshme, duke përfshirë edhe adresimin në Organizatën Botërore të Tregtisë, për të siguruar reciprocitetin në tregtinë dypalëshe dhe për të mbrojtur interesat legjitime kombëtare”, thuhet në njoftim.

Ministrja e Jashtme kolumbiane Laura Sarabia tha se ata po shqyrtojnë masat për të mbrojtur mbi të gjitha industrinë kombëtare dhe eksportuesit.

Ministria kineze e Tregtisë u bën thirrje Shteteve të Bashkuara që të revokojnë menjëherë këto masa tarifore të njëanshme dhe të zgjidhin siç duhet mosmarrëveshjet tregtare përmes dialogut me partnerët e saj.

“Kina e kundërshton me vendosmëri këtë lëvizje dhe do të marrë kundërmasa vendimtare për të mbrojtur të drejtat dhe interesat e saj”, tha zëdhënësi.

Paraprakisht, agjencia shtetërore kineze e lajmeve Xinhua publikoi një koment duke i quajtur tarifat "dhunë vetëshkatërruese" dhe duke akuzuar Trampin për "kthimin e tregtisë në një lojë tepër të thjeshtuar hakmarrjeje".

Kina është ndoshta më e goditura nga vendimi I sotëm i Trampit, pasi një tarifë shtesë prej 34 për qind është vendosur për të gjitha mallrat kineze - mbi 20 për qindëshin ekzistues.

Foto: EPA