Shkup, 6 prill 2026 (MIA) - Qeveria punon me të gjitha palët e interesuara për të arritur një version përfundimtar të ligjit për mbrojtje nga pirja e duhanit. Nuk është e drejtë që fëmijët e moshës më të vogël të përdorin cigare elektronike me aromë të cilët më pas mund të transformohen në diçka tjetër, tha sot kryeministri Hristijan Mickoski.

Duke u përgjigjur në pyetjen e gazetarëve pas vënies në përdorim të gjashtë sallave të operacionit të klinikave kirurgjikale në Qendrën Klinike "Nënë Tereza", ai shpjegoi se importuesit u arsyetuan duke thënë se do të ketë kontrabandë të të ashtuquajturve "vejp" apo cigare elektronike me aromë nga vendet fqinje.

"Pra, tani nuk është një gjë e keqe, alternativa është një tjetër gjë e keqe. Ky nuk është thelbi i kësaj reforme. Ne themi që të gjithë mund të shesin atë që duhet të shesin, por duhet të ketë një rregull të qartë se si do të funksionojë e gjitha. Nuk mund të kemi këto kërkesa, le të vazhdojmë të lejojmë përdorimin e cigareve elektronike me aromë dhe t'i lejojmë fëmijët 11-12 vjeç t'i përdorin ato. Kjo nuk është e drejtë. Kjo është ajo që nuk duam të jetë në ligj, dhe ata thonë se duhet të ketë një ose dy shije, mentol. Kjo nuk është tryezë suedeze - dua pak nga kjo, pak nga ajo, ose ne ndjekim një qasje holistike, një qasje me të cilën do të bëjmë diçka, ose është më mirë ta lëmë siç është tani, pa kontroll dhe të shohim se ku do të arrijmë. Kuptohet se kjo e fundit nuk është zgjidhje. Sigurisht, e para do të jetë zgjidhje dhe duhet të kemi një kornizë. Nuk mundet kështu", theksoi Mickoski.

Ai tha se ligji ekzistues ka zbatim selektiv ose aspak, gjë që sipas kryeministrit është një recidivë e së kaluarës të cilën duan ta kanalizojnë.

"Pirja e duhanit bëhet aty ku nuk duhet të bëhet. Dhe këtu biseduam me grupacionin HOREKA, hotelet, restorantet, klubet dhe këtu tashmë kemi një lloj zgjidhjeje. Por edhe në lidhje me prodhuesit dhe importuesit, do të bini dakord se kemi gjithnjë e më shumë shembuj të të miturve që përdorin të ashtuquajturat cigare elektronike ose vejp me aromë", nënvizoi Mickoski.

Ministri i Shëndetësisë, Azir Aliu nënvizoi se strategjia e Qeverisë është që të gjitha ligjet t’i përpilojnë në mënyrë të sinkronizuar me të gjitha palët e interesuara në vend.

"Këtë e bëmë me këtë ligj. Patëm disa takime në nivel pune me grupet e punës, por edhe në nivel politik kryeministri ishte i përfshirë në të gjithë procedurën. Jemi duke u koordinuar dhe sinkronizuar vazhdimisht me të gjitha institucionet qeveritare dhe joqeveritare dhe komunitetin e biznesit. Ligji është drejt fundit. Sot kam takimin e fundit për të sinkronizuar më tej nga pikëpamja ligjore. Dhe vlerësoj që kjo javë ose java tjetër do të jetë pjesë e procedurave qeveritare", deklaroi Aliu.

Foto: MIA