Shkup, 20 qershor 2023 (MIA) - Kryeministri Dimitar Kovaçevski ende nuk e ka parë deklaratën e sotme të presidentit bullgar Rumen Radev, sipas të cilit vendi “nuk ka nxjerr mësim nga viti i kaluar që të mos lobojë te anëtarët e BE-së ose te institucionet evropiane“, por theksoi se presidenti i një vendi fqinj duhet të merret më shumë me reformat në vendin e tij.

"Nuk e kam parë deklaratën dhe nuk do të kisha gjë për të komentuar. Maqedonia e Veriut ka qëndrime shumë të qarta në kudër jo vetëm të BE-së, por edhe brenda NATO-s. Ne jemi një vend i cili 100 për qind e ka harmonizuar politikën e saj të jashtme me BE-në, vend i cili në mënyrë të barabartë me vendet tjera miraton vendime në NATO, përfshirë së bashku Bullgarinë. Ne çdo vit kemi raporte evropiane për përparimin e reformave, konsideroj se presidenti i një vendi fqinj duhet të merret më shumë me reformat në vendin e tij", theksoi Kovaçevski, duke u përgjigjur në pyetjen e gazetarëve pas fjalimit në përvjetorin e 70-të të themelimit të Institutit për gjuhën maqedonase “Kërste Misirkov” dhe 120 vjet nga botimi i librit “Për çështjet maqedonase".

Presidenti bullgar Radev sot deklaroi se vendi "nuk ka nxjerrë mësime nga viti i kaluar që të mos lobojë te anëtarët e BE-së apo institucionet evropiane".

"Shkupi duhet ta mësojë leksionin për BE-në. Shoh se ata përsëri kthehen në të njëjtën rrugë para kornizës negociuese, për të lobuar te anëtarët e BE-së, para institucioneve evropiane, duke mbuluar kështu mungesën e reformave, mosrespektimin e të drejtave të njeriut dhe mosgatishmërinë për fillim të negociatave. Kjo nuk është rruga e duhur. Bullgaria do të vazhdojë të punojë me të gjitha institucionet në Bruksel, me partnerët tanë evropianë, në mënyrë që zgjidhjet për Republikën e Maqedonisë së Veriut të mos bazohen në lobim që fsheh mungesën e reformave dhe mosrespektimin e të drejtave", thekson Radevi në përgjigjen e pyetjes së gazetarëve.

Foto printskrin MIA dhe arkivi i MIA-s