Shkup, 16 prill 2024 (MIA) - Me më shumë se 30 ngjarje promovuese, nga data 18 deri më 24 prill në arenën "Boris Trajkovski" në Shkup do të mbahet edicioni i 36-të i Panairit të librit. Sllogani është "Një tregim lexohet", qëllimi i së cilës është ta afrojë panairin te popullata më e re, ndërsa përveç aspektit edukativ-kulturor, këtë vit vendoset edhe komponenta me përgjegjësi shoqërore.

Daniela Gligorovska, udhëheqëse e Panairit të Shkupit në brifingun e sotëm me gazetarët, njoftoi se panairi do të jetë i hapur për vizitorët në orën 10, ndërsa në orën 13 do të jetë hapja zyrtare, me ç'rast fjalime do të ketë ministrja e kulturës, duke pasur parasysh që Ministria e Kulturës është udhëheqës, ndërsa Panairi i librit është shpallur për projekt të interesit kombëtar në kulturë.

Sivjet, siç tha ajo, Panairi i librit ka edhe një komponent të përgjegjshëm shoqëror. Me çdo biletë të rregullt të blerë, 15 denarë do të dhurohen për SOS Fshatin e Fëmijëve. Gjithashtu, me rastin e 23 Prillit - Ditës Botërore të Librit, në SOS fshatin e fëmijëve dhe DUCOR "Partenija Zografski" nga Shkupi - shkolla e mesme për nxënës me dëgjim të dëmtuar 100 libra dhe abonime vjetore falas do të dhurojë Boksi - ekspozues i panairit, për një vit leximi onlajn të librave.

Kryetari i Shoqatës së Botuesve të Maqedonisë (SHBM), Bojan Sazdov, në konferencën e sotme informoi se sivjet në Panairin e Librit është shtuar edhe programi profesional, programi Fellouship, sipas shembullit të të gjitha panaireve të mëdha botërore.

"Ideja ishte që Panairi të merrte një dimension tjetër dhe përmes një konkursi të hapur, i cili iu përcoll të gjithë botuesve dhe shoqatave rajonale dhe evropiane, të ftoheshin profesionistë të fushës, të cilët do të vijnë në vendin tonë dhe do të njihen me trendet bashkëkohore, në letërsinë tonë, me shtëpinë tonë botuese, të rrjetohemi më mirë, të njihemi me botuesit, me synimin që letërsia jonë të vendoset më mirë jashtë vendit", tha Sazdov.

Këtë vit, siç paralajmëroi ai, do të vijnë pesë të ftuar - një agjent letrar nga Franca, por edhe përfaqësues nga Sllovenia, Greqia, BeH dhe Mali i Zi.

Këtë vit, po prezantohet një koncept i ri i vendosjes së stendave, për një shikueshmëri më të mirë të të gjithë ekspozuesve dhe botuesve, dhe botuesit më të vegjël për sa i përket pamjeve katrore do të jenë vizualisht më të aksesueshëm për audiencën.

"Këtë vit kemi një program të pasur ngjarjesh, promovimesh dhe miqësish me autorë që do të zhvillohen në qendrën promovuese si skenë kryesore, gjatë gjashtë ditëve të panairit. Nuk do të ketë promovime ditën e fundit. Do të zhvillohen rreth 30 aktivitete, duke përfshirë ndarjen e çmimeve nga Shoqata e Botuesve dhe natyrisht, programin fellouship", tha drejtoresha operative e Panairit të Librit Sanja Kondarko.

Ajo përmendi se në kuadër të programit fokusi nuk do të jetë vetëm tek shitja e librave, por edhe tek afrimi i autorëve, miqësia, ndërveprimi me lexuesit.

Orari i punës së Panairit të Librit do të jetë nga ora 10:00 deri në 20:00. sa/

Foto: MIA