Shkup, 20 gusht 203 (MIA) - Për pushtetin, ndryshimet kushtetuese janë të nevojshme që shteti të përmbushë qëllimin e tij strategjik dhe interesin e lartë kombëtar, që është anëtarësimi në BE. Zëvendëskryeministri për Çështje Evropiane, Bojan Mariçiq, tha dje se sa më shumë të presim aq më shumë dhe më të mëdha do të hapen çështje, të cilat vetëm sa do ta komplikojnë procesin dhe do ta forcojnë pozitën e Bullgarisë. Për opozitën, nga ana tjetër, zgjedhjet janë zgjidhja e vetme dhe mbeten të mendimit se nuk do të ketë ndryshime kushtetuese nën diktat bullgar. Lideri i VMRO-DPMNE-së Hristijan Mickoski dje tha se pas zgjedhjeve do të ofrojnë zgjidhje.

"Praktika tregon se koha nuk funksionon në favorin tonë kur jemi jashtë procesit. Sa më gjatë të presim, do të hapen gjithnjë e më shumë çështje, të cilat vetëm sa do ta komplikojnë procesin dhe do të forcojnë pozitën e Bullgarisë. Të mos i lejojmë vetes ta komplikojmë procesin kur rruga tashmë është e qartë para nesh", thekson zëvendëskryeministri për Çështje Evropiane Bojan Mariçiq në një intervistë për Racin.mk.

"Marrëveshja nuk është bërë sipas "diktatit bullgar" Përkundrazi, ne kemi arritur një marrëveshje me të cilën kemi nxjerrë maksimumin dhe kemi negociuar në favorin tonë, me të cilin kemi arritur t'i vendosim në një kornizë kërkesat dhe obligimet e të dyja palëve, edhe maqedonase dhe bullgare", thotë ai.

Ai shton se korniza jonë e negociatave e mbron gjuhën dhe identitetin maqedonas, me të cilin, thotë ai, arritëm që çështjet bullgare të mos bëhen evropiane dhe të mos e vënë në pikëpyetje  të ardhmen evropiane të Maqedonisë së Veriut.

"Detyrimet janë të përshkruara në kornizën e negociatave dhe janë detyrime që ne i kemi pranuar për arritjen e objektivit strategjik deri në vitin 2030, që është anëtarësimi i plotë në BE. Kërkesat tona kryesore në marrëveshje janë përmbushur dhe për këtë arsye nuk ka asnjë argument të vetëm që ndryshimi i Kushtetutës së Maqedonisë të quhet diktat bullgar - jo, ai është një propozim evropian dhe pas një propozimi të tillë e gjithë BE-ja nuk do të qëndrojë kurrë së bashku përsëri sepse në Union ka procese turbulente dhe zgjedhje evropiane vitin e ardhshëm", thekson Mariçiq.

Ai është i vendosur se nuk do të ketë kornizë më të mirë.  "E gjithë BE-ja na e thotë këtë, ne e dimë vetë dhe kushdo që thotë të kundërtën nuk dëshiron ta shohë vendin tonë në BE. Marrëveshje më e mirë se ajo që kemi nuk mund të arrihet, me këtë jemi në një pozitë të favorshme nga e cila lehtë dhe pa dhimbje mund të vihen në pah interesat tona kombëtare dhe të garantohet perspektiva evropiane", thekson Mariçiq.

"VMRO-DPMNE-së i është thënë shumë herë nga miqtë tanë evropianë, përfaqësues të lartë të vendeve anëtare të BE-së, diplomatë në vend, eurodeputetë se korniza e negociatave nuk mund të rinegociohet dhe se një marrëveshje e re nuk është e mundur", thekson Mariçiq.

Ai thotë se nuk mund të ketë rinegocim të kornizës që është rënë dakord dhe miratuar vitin e kaluar në Konferencën e parë Ndërqeveritare dhe ne nuk mund ta ndryshojmë atë.

Lideri i VMRO-DPMNE-së Mickoski, një ditë pas seancës kuvendore për ndryshimet kushtetuese, tha se është plotësisht e qartë se nuk ka ndryshime kushtetuese nën diktat bullgar dhe nuk do të ketë. Sipas tij, i rremë është  pretendimi i qeverisë dhe thjeshtësimi i gjërave se pranimi i ndryshimeve kushtetuese sipas diktatit bullgar do të varet nga fakti nëse do të kishim qenë për BE-në apo kundër BE-së.

"Kjo nuk është aspak një zgjidhje e tillë, sepse shumica e popullit dhe unë si kryetar i VMRO-DPMNE-së jemi pa mëdyshje për hyrjen e Maqedonisë në Bashkimin Evropian, sepse kjo është rruga jonë e vetme. Por jo me çmimin e vetëmohimit, jo me çmimin e diktatit që është kutia e Pandorës për shpifjen e identitetit dhe hapjen e portës për shumë kërkesa të tjera. Jo për të hyrë në lojën e përsëritur të shkopit dhe karrotës, pa asnjë garanci për hyrje në BE, nga e cila vendi do të shohë vetëm shkopin, pra një tjetër bllokadë. Në fund, të gjithë besojmë në kriteret e Kopenhagës, që sigurisht nuk janë pranimi i furisë së kërkesave nga një shtet fqinj, me një tendencë të qartë për të fshirë ekzistencën dhe historinë e një shteti tjetër", theksoi mes tjerash Mickoski.

Sipas tij, nuk është e vërtetë se koncepti "Maqedonia dhe BE-ja" është mposhtur, siç dëshiron ta prezantojë pushteti, por është mposhtur koncepti i tyre për t'i parë gjërat  "si mund të vijë Maqedonia apo të mos vijë kurrë në BE".

"Gabimi kryesor i pushtetit në procesin e krijimit të kësaj zgjidhjeje, të cilën e shohim si përfundoi, është se e përjashtoi plotësisht opozitën. Ata u ulën, ranë dakord, pranuan gjithçka që pala tjetër donte dhe dolën publikisht dhe tani thonë eja pranoni. Ata nuk mund të kërkojnë konsensus për diçka në të cilën ne nuk kemi qenë të përfshirë në krijimin e tij", nënvizoi Mickoski.

Ai përsëriti se vendi është në krizë të madhe dhe se zgjidhja e vetme janë zgjedhjet dhe pas zgjedhjeve do të ofrojnë një zgjidhje e cila, thotë ai, do të mbrojë dhe avancojë interesat e shtetit.

Nga LSDM-ja qeveritare sërish reaguan se Hristijan Mickovski konfirmoi se është kundër BE-së dhe dëshiron të bllokojë të ardhmen evropiane të vendit dhe të tërheqë vendin edhe për 11 vjet jashtë BE-së.

Në Kuvend të premten ka përfunduar debati për Propozimin për inkuadrim në ndryshimin e Kushtetutës, i cili parasheh përfshirjen e bullgarëve dhe pesë bashkësive të tjera etnike në Preambullë dhe votimi është shtyrë për sigurimin e shumicës së nevojshme prej dy të tretash.

Kryetari i Kuvendit Talat Xhaferi në një intervistë për MIA-n që në fillim të këtij muaji, bëri të ditur se pas përfundimit të debatit, votimi për nevojën e ndryshimeve kushtetuese mund të shtyhet dhe nëse nuk ka kushte, mund të mos ndodhë fare, kështu që procedura për ndryshime kushtetuese përfundon.

Për miratimin e Propozimit për inkuadrim në ndryshimin e Kushtetutës, është e nevojshme të votohen së paku 80 deputetë. Është e para nga gjithsej tre fazat e nevojshme për ndryshimin e Kushtetutës.

Përfshirja e bullgarëve në Kushtetutë është kusht që vendi të mbajë seancën e dytë ndërqeveritare dhe të vazhdojë negociatat me Bashkimin Evropian për anëtarësim të plotë duke hapur klasteret dhe kapitujt. sa/

Foto: Arkivi i MIA-s