Shkup, 10 prill 2023 (MIA) - Kryesuesi i OSBE-së dhe Ministri i Punëve të Jashtme, Bujar Osmani, nga sot ndodhet për vizitë në Kaukazin e Jugut. Vizitën katërditore në Gjeorgji, Azerbajxhan dhe Armeni, Osmani do ta nisë nga Tbilisi. Në agjendë janë takime me përfaqësuesit më të lartë shtetëror të Gjeorgjisë, presidenten Salome Zurabishvili dhe Kryeministrin Irakli Garibashvili.

Gjithashtu, siç paralajmëruan nga Ministria e Punëve të Jashtme (MPJ), përveç takimit, Osmani dhe Ministri i Punëve të Jashtme i Gjeorgjisë, Ilia Darçiashvili, do të kenë edhe një deklaratë të përbashkët për media.

"Kryesuesi Osmani do t'i përcjellë Gjeorgjisë mesazhin për rëndësinë e rolit të Gjeorgjisë si vend pjesëmarrës i OSBE-së, i cili është vend kyç për iniciativat ndërrajonale, dhe porosinë se OSBE-ja do të vazhdojë të ofrojë mbështetje thelbësore në zbatimin e angazhimeve në tre dimensione, që do të kontribuojë në zbatimin e procesit të reformave të brendshme", potencojnë nga MPJ.

Përveç personave zyrtarë, Osmani do të bisedojë edhe me Delegacionin e Asamblesë Parlamentare të OSBE-së nga Kuvendi i Gjeorgjisë, si dhe me përfaqësues të sektorit civil dhe të pakicave kombëtare. Në kuadër të vizitës, së bashku me Misionin Monitorues të Bashkimit Evropian në Gjeorgji, Osmani do të zhvillojë takime në terren me qytetarë nga rajonet e prekura për të mësuar më shumë për sfidat me të cilat ballafaqohen vet ata.

Vizita e Osmanit vazhdon në Baku të Azerbajxhanit, ku do të zhvillojë edhe takime me kreun e shtetit. Osmani do ta përfundojë agjendën për Kaukazin e Jugut në Armeni.