Shkup, 17 gusht 2023 (MIA) - Ministri i Punëve të Jashtme, Bujar Osmani në prag të mbledhjes së Kuvendit për ndryshimet kushtetuese i dërgoi letër të hapur deputetëve në Parlament, në të cilën porositë se nga vendimi i tyre do të varet nëse vendi do t'i vazhdojë negociatat ose do t'i ndërpresë në afat më të gjatë pa garanca për sukses.

"Të premten do të fillojë diskutimi, e më pastaj votimi për çështjen e dytë më të rëndësishme që çdo legjislaturë parlamentare duhet ta kishte bërë në historinë e vendit pas pavarësisë - pas anëtarësimit në NATO, arritja e qëllimit të dytë strategjik të shtetit për anëtarësim në familjen e shteteve progresive evropiane. Të premten, Ju do të vendosni për të ardhmen evropiane të Maqedonisë së Veriut, përcaktim ky për të cilin jemi duke punuar dhe kanë punuar të gjitha Qeveritë në 30 vitet e fundit. Nga Ju varet nëse me pranimin e ndryshimit të Kushtetutës do t'i vazhdojmë bisedimet për kapitujt e anëtarësimit në Union apo do të ngecim në negociata për një afat më të gjatë, deri në një mundësi të re, pa asnjë garanci suksesi, duke nxitur procesin e “pasaportizimit” të qytetarëve që kërkojnë një të ardhme evropiane për veten e tyre", thotë ministri Osmani.

Besoj dhe e di, shton Osmani, që secili prej jush dëshiron që të jemi anëtarë të Unionit të përbërë nga vendet më demokratike dhe më të pasura në botë që garanton paqe, zhvillim demokratik dhe prosperitet ekonomik.

"Në procesin e negociatave kishim për qëllim ruajtjen dhe forcimin e gjuhës maqedonase dhe identitetit nacional maqedonas. Me plot përgjegjësi them se ia dolëm. Gjuha maqedonase është pranuar dhe votuar për herë të parë në Këshillin e BE-së mes shteteve anëtare dhe është pa mëdyshje pjesë e gjuhëve evropiane. Askush nuk mund ta mohojë këtë fakt", thotë më tutje Osmani.

Ai thekson se i kupton të gjithë ata që druajnë nga mundësitë për tentime të mëtutjeshme për mohim dhe imponim të kushteve të reja bilaterale dhe me atë rast shfaq bindje se çështjet e identitetit dhe ato historike nuk janë pjesë e negociatave.

"Me shumë përgjegjësi pohoj se çështjet historike dhe identitare nuk janë pjesë e udhërrëfyesve dhe dispozitave nga të cilat varet hapja dhe mbyllja e kapitujve. Me këtë ndryshim të Kushtetutës, ne vetëm do ta përforcojmë pozitën tonë ndërkombëtare dhe do ta rrisim mbështetjen ndërkombëtare për qëllimet tona. Përmes negociatave do të përmirësohen dhe forcohen dukshëm mundësitë për të vazhduar promovimin dhe avancimin e veçantisë, historisë dhe kulturës nacionale maqedonase" thekson Osmani.

Çdo njeri dhe politikan/e do të ishte i/e lumtur të ngelte në kujtesën e historisë që ka vepruar në mënyrën e duhur kur ka qenë më së shumti e rëndësishme. Të ngelet në kujtesë se ka qenë në anën e duhur, se nuk ka hezituar në vendimin me të cilin ka ndihmuar vendin të ecë përpara, ndërsa njerëzit në të të jetojnë më mirë. "Unë personalisht nuk kam asnjë dyshim se me këtë ndryshim të Kushtetutës do të bëjmë çfarëdo lloj gabimi, përkundrazi do të hapim një kapitull të ri të zhvillimit dhe stabilitetit për qytetarët tanë", thekson ministri i Punëve të Jashtme.

Ai edhe njëherë, si shpesh në paraqitjet e tij publike, shfaqë bindje se ky ndryshim nuk ndryshon asgjë në pozitën e bullgarëve në Maqedoni dhe në lidhje me të drejtat që deri më tani i kishin dhe të cilat ua garantonte Kushtetuta. Ky ndryshim, shton ai, na jep mundësi që Republikës së Bullgarisë dhe botës t'u dëshmojmë se ata nuk janë të diskriminuar, sepse në realitet është kështu.

"Kjo është mundësi që tua marrim të gjitha argumentet dhe pastaj të nxitojmë drejt proceseve reformuese, të cilat janë më të rëndësishmet për qytetarët tanë dhe në interesin tonë më të mirë. Me ndryshimin e Kushtetutës do të qartësohet se krahas popullit maqedonas në vend jeton edhe një pjesë e popullit bullgar, i cili është ndryshe. Dhe në fund, e them me përgjegjësi se këtë nuk po e bëjmë nën diktatin e Bullgarisë e as për shkak të shantazhit nga ana e saj. Ky është kompromis në negociata pasi që memorandumi i tyre deri tek BE për mosnjohje të gjuhës dhe kombit maqedonas nuk mori mbështetje nga vendet anëtare. Kompromis me të cilin e mbrojtëm gjuhën dhe identitetin maqedonas", qëndron në letrën e Osmanit drejtuar deputetëve. ab/