Shkup, 3 nëntor 2023 

Deklarata e kryetares së Gjykatës Supreme, Besa Ademi, se presioni ndaj gjykatësve është një praktikë, sa është e vërtetë, po aq është e dhimbshme. Kjo është diçka më shumë se një dëshmi relevante e shqetësimit tonë, për çfarë ne e kemi ngritur zërin në mënyrë të vazhdueshme.

Tashmë dihet qartë se kush po bën presion ndaj gjyqësorit dhe pse po e bën këtë. BDI-ja dhe LSDM-ja po vazhdojnë t’i shkelin të gjitha vlerat demokratike, pavarësinë institucionale, integritetin e gjykatësve dhe, në përgjithësi, të sistemit të drejtësisë, duke ushtruar zhvatje mbi ta, për ta kthyer Gruevskin dhe për ta shpëtuar shpurën e kriminelëve të tij, gjithë kjo në favor të kalkulimeve elektorale për zgjedhjet e ardhshme parlamentare. Andaj e përshëndesim këtë deklaratë e cila ndihmon që edhe njëherë të zhveshë BDI-në dhe kredibilitetin e saj të munguar, si dhe të dëshmojë që ajo e ka humbur dhe po e humb mbështetjen dhe influencën e saj politike.

Ne – opozita e bashkuar shqiptare – gjykojmë se këto janë veprime të pafalshme, andaj qëndrojmë fuqishëm në mbështetje të gjykatësve në Gjykatën Supreme. Njëkohësisht, u bëjmë thirrje të rezistojnë, që të mos bien pre e shantazheve dhe kërcënimeve të tyre dhe të veprojnë në bazë të akteve dhe normave ligjore.

Askush nuk guxon ta cenojë në këtë mënyrë pavarësinë e gjyqësorit e aq më pak vetë drejtësinë, ndërsa ata që e bëjnë këtë duhet të marrin dënimin e duhur. Gjithsesi, dënimin më të madh do ta kenë në zgjedhje, nga të cilat na ndajnë pak muaj.

Alternativa

Lëvizja BESA

Lëvizja Demokratike

__________________________________________________________________________

MIA këto tekste i publikon në formën integrale dhe origjinale dhe nuk mban përgjegjësi për përmbajtjen e tyre dhe as për mangësitë eventuale drejtshkrimore apo gabimet e shtypit.

Foto: Opozita shqiptare