Shkup, 29 janar 2025 (MIA) - Federata e Futbollit të Maqedonisë (FFM), përmes ekipit të projektit tashmë të formuar për implementimin e sistemit VAR, ka filluar zbatimin e aktiviteteve në lidhje me sistemin e ndihmës së arbitrave përmes videoteknologjisë.

Sistemi VAR në Ligën e Futbollit të Maqedonisë (LFM) duhet të fillojë të përdoret nga fillimi i sezonit të ardhshëm garues 2025/26. FFM-ja tashmë ka njoftuar UEFA-n dhe FIFA-n për fillimin e aktiviteteve zbatuese.

Lideri i ekipit të projektit për implementimin e VAR, Dejan Jakimovski, informoi për dinamikën e aktiviteteve.

"Kemi zhvilluar një takim fillestar onlajn me FIFA-n dhe kemi përcaktuar tashmë disa nga procedurat e rëndësishme për zbatimin e sistemit VAR në LFM. Sipas planit fillestar dhe dinamikës së aktiviteteve, është planifikuar që nga sezoni i ardhshëm garues të fillojë përdorimi i videoteknologjisë. Ndeshjet e LFM-së së Parë, Kupa e Maqedonisë (nga faza e 1/4 finale), Kupa e Maqedonisë (finale - femra) dhe ndeshjet play-off për LFM-në e Parë janë garat që do të përfshihen. Synimi ynë është të implementojmë një sistem të centralizuar VAR, një dhomë të veçantë në FFM dhe në varësi të ofertave të ofruesve të VAR, do të fillojmë të përdorim deri në gjashtë kamera për ndeshje.

Ajo që është gjithashtu jashtëzakonisht e rëndësishme për ne është se kemi filluar planet për edukimin e gjyqtarëve të VAR-it. Në fillim të marsit në Shkup do të organizojmë punëtori dyditore ku do të marrin pjesë ekspertë nga FIFA, ekipi ynë i projektit, arbitri dhe komisioni i garave në FFM dhe persona të tjerë të përfshirë në projekt", theksoi Jakimovski.

Gjithashtu, në periudhën në vijim do të nisë edhe përshtatja e infrastrukturës së stadiumit, pra krijimi i minimumit të nevojshëm për marrjen e licencës, pra leje për zhvillimin e ndeshjeve. Licencimi i stadiumeve, dhomave të centralizuara të VAR-it dhe gjyqtarëve VAR kryhet vetëm nga FIFA.

Në ekipin e projektit VAR në Federatën e Futbollit të Maqedonisë janë edhe Dimitar Meçkarovski, Josip Barton, Goran Spirkoski dhe Nikolla Karakolev.

Zbatimi i sistemit VAR në LFM do të përmirësojë drejtësinë dhe transparencën në vendimet e arbitrimit në ndeshje. sa/

Foto: FFM