Shkup, 6 tetor 2025 (MIA) - Një nga tre prioritetet kryesore të Qeverisë është lufta kundër korrupsionit, me rëndësi të madhe të sundimit të ligjit dhe luftës kundër korrupsionit në kuadër të anëtarësimit tonë në Bashkimin Evropian, deklaroi sot Ministri për Çështje Evropiane, Orhan Murtezani, në konferencën e përbashkët për shtyp në Shkup me Ministren Federale Austriake për Evropë, Integrim dhe Familje, Klaudia Plakolm, dhe Sekretaren Shtetërore Sllovene në Ministrinë e Punëve të Jashtme dhe Evropiane, Neva Grashiç.

Murtezani duke u përgjigjur në pyetjen e gazetarëve për pikëpamjen e tij për luftën kundër korrupsionit dhe reformat në gjyqësor, në kontekstin se gjykatat nuk po zbatojnë një vendim për një kompani austriake, e cila ka një vendim nga një gjykatë arbitrazhi, theksoi se nuk ka rrugë tjetër për zbatimin e reformave përveç asaj evropiane, por përmendi se për momentin nuk ka informacione për rastin konkret. 

 Ministri në konferencën për shtyp theksoi se është gjithmonë një kënaqësi e vërtetë kur në Shkup vijnë miqtë tanë nga Austria dhe Sllovenia, vende me të cilat na lidhin miqësi të sinqerta, partneritete afatgjata dhe afërsi e thellë evropiane.

 "Në këtë kontekst, do të doja, para së gjithash, të shpreh mirënjohje të sinqertë për Austrinë dhe Slloveninë për ndihmën që na kanë dhënë në shuarjen e zjarreve në verat e fundit. Mbështetja nga ekipet austriake të zjarrfikësve dhe dhurimi i automjeteve të specializuara zjarrfikëse nga Krahina e Tirolit është miqësi e vërtetë në vepër. Gjithashtu,  thellësisht jemi mirënjohës për reagimin e shpejtë dhe efikas të shërbimeve dhe ekipeve sllovene që ndihmuan në përballimin e zjarreve, duke treguar solidaritet të vërtetë evropian dhe afërsi njerëzore në momentet kur ishte më e nevojshme. Shfrytëzoj këtë rst , përmes pranisë suaj, znj. Plakolm dhe znj. Grashiç, për të shprehur mirënjohjen e thellë si për popullin slloven ashtu edhe për atë austriak për solidaritetin e sinqertë dhe afërsinë njerëzore që treguan në ato momente kritike. Kjo gatishmëri për të ndihmuar pa hezitim shkon përtej kornizës së bashkëpunimit institucional - është një shprehje e bashkimit dhe besimit të vërtetë midis vendeve tona", tha Murtezani.

 Ai theksoi se në takimin me Plakolmin dhe Grashiçin, kanë biseduar për forcimin e bashkëpunimit në integrimet evropiane dhe lidhjen institucionale, bashkëpunimin ekonomik, tranzicionin energjetik dhe zhvillimin e politikave të qëndrueshme në dobi të qytetarëve.

"Austria dhe Sllovenia janë ndër partnerët dhe mbështetësit tanë më të qëndrueshëm në procesin e anëtarësimit në Bashkimin Evropian, por edhe në përpjekjet e Maqedonisë së Veriut që të mbetet nxitës i stabilitetit dhe reformave në rajon. Austria, përmes mbështetjes së saj aktive në kuadër të politikës së zgjerimit dhe përmes Agjencisë Austriake për Zhvillim, është e pranishme në disa segmente të proceseve tona reformuese: nga forcimi i institucioneve dhe sundimi i ligjit, deri te zhvillimi ekonomik dhe mbrojtja e mjedisit. Sllovenia, një vend me të cilin na lidh një e kaluar e përbashkët dhe me të cilin kemi një traditë të gjatë miqësie dhe mirëkuptimi të ndërsjellë, është gjithashtu një aleat i rëndësishëm në transferimin e përvojave nga negociatat e anëtarësimit, në ndihmën teknike, si dhe në zbatimin e projekteve konkrete të mbështetura nga fondet sllovene të zhvillimit: në energji, digjitalizim, arsim dhe zhvillim ekonomik lokal", shtoi Murtezani.

 Ai theksoi se ky bashkëpunim i frytshëm është pjesë e një historie më të gjerë evropiane të progresit të përbashkët, stabilitetit dhe vlerave të përbashkëta.

"Jam i bindur se bisedimet e sotme do të kontribuojnë në një bashkëpunim edhe më intensiv dhe të koordinuar midis tre vendeve, në frymën e agjendës së përbashkët evropiane. Republika e Maqedonisë së Veriut mbetet një partner i përkushtuar dhe i besueshëm, ne si Qeveri jemi të vendosur të vazhdojmë me reformat dhe me një kontribut aktiv për stabilitetin, solidaritetin dhe unitetin e Bashkimit Evropian", shtoi Ministri i Çështjeve Evropiane. 

Foto: MÇE