Shkup, 23 qershor 2025 (MIA) - Sfida më e madhe në periudhën e ardhshme për kryeministrin Hristijan Mickoski dhe Qeverinë do të jetë mundësimi i një sistemi që mund të japë drejtësi shpejt dhe në të cilin "banditizmi" i krijuar nga strukturat politike dhe afariste që punojnë në koalicion të gjerë nuk do të mund të funksionojë, sepse, sipas tij, shumë zhvillime të mëvonshme politike në vend do të varen nga kjo.

"Në këtë një vit kemi nisur një luftë të fortë kundër krimit. Aksionet janë nisur kundër atyre që më parë konsideroheshin të paprekshëm. Sot ata krerët famëkeq të padrejtësisë janë të arratisur nga ligji dhe një goditje e fortë u është dhënë bandave të drogës, veçanërisht në Shkup. Aty ku mendoj se gjërat mund të jenë më mirë është lufta për një gjyqësor dhe prokurori të pavarur, të cilën aktualisht nuk e kemi. Nuk jam i kënaqur me dinamikën e dhënies së drejtësisë dhe ka lidhje të dukshme mes asaj bote dhe botës së mafias së biznesit politik që ndërtoi sistemin kundër të cilit duam të luftojmë, dhe nëse më pyesni, pres llogaridhënie dhe populli pret llogari dhe kjo duhet të jetë gjëja e parë që do të na udhëheqë, të sjellim drejtësi dhe të rrënojmë atë sistem banditizmi të krijuar nga strukturat politike dhe afariste, për të cilat nuk ka as dallime politike as etnike por funksionojnë në koalicione të gjera. Kjo do të jetë sfida ime më e madhe në periudhën në vijim dhe nga kjo dinamikë do të varen shumë zhvillime të mëvonshme politike në vend", tha kryeministri Hristijan Mickoski sonte në fjalimin e tij në manifestimin për shënimin e një viti të Qeverisë, nën sloganin "Po vjen koha e Maqedonisë! Po ndërtojmë themelet e ndryshimit".

Ai iu referua edhe asaj që tha se ishte dita më e vështirë si kryeministër, fatkeqësia në Koçan.

Maqedonia, shtoi ai, duhet të ecë përpara, duke theksuar se kurrë nuk do të lejojë që vendi të poshtërohet.

Ai përkujtoi se reforma janë iniciuar edhe në Ministrinë e Punëve të Brendshme. Ai theksoi se kaosi me lëshimin e pasaportave është zgjidhur plotësisht, është blerë një makinë tjetër për printimin e dokumenteve personale dhe është zgjidhur plotësisht procesi i dhënies së dokumenteve personale.

Në fushën e drejtësisë, theksoi Mickoski, është anuluar vendimi i qeverisë së kaluar për dhjetëfishimin e tarifave të noterëve.

Në fjalën e tij ai u kthye në çështjen e marrëdhënieve ndëretnike, duke theksuar se po punohet për zbutjen e tyre.

"Kemi miratuar një program të ri për promovimin dhe mbështetjen e bashkësive etnike me qëllim të përmirësimit të marrëdhënieve ndëretnike dhe forcimit të kohezionit multikulturor, si dhe promovimit të vlerave multikulturore. Për herë të parë është hartuar Plani Strategjik për garantimin e të drejtave të të gjitha bashkësive etnike dhe promovimin e marrëdhënieve ndëretnike", tha Mickoski.

Ai shtoi se është folur shumë në fushën që mbulon Ministria e Mbrojtjes dhe se aty ka pasur arritje më të mëdha.

"Procesi i modernizimit të Armatës është një proces që po zbatohet me intensitet të madh dhe mbështetet nga buxheti i mbrojtjes. Këtë vit po ndajmë 32 për qind të buxhetit, ose 106 milionë euro, që është 18 milionë euro më shumë se vitin e kaluar, 2024. E thënë thjesht, modernizimi nuk do të ndalet, por përkundrazi – do të intensifikohet", theksoi kryeministri i Maqedonisë.

Në fjalën e tij ai theksoi gjithashtu se Maqedonia është vendi i parë në rajon që ka nënshkruar Partneritet për Siguri dhe Mbrojtje me Bashkimin Evropian, i cili pasqyron bashkëpunimin e shkëlqyer dhe të vazhdueshëm me Unionin dhe paraqet një hap kyç drejt bashkëpunimit më të ngushtë në një gamë të gjerë çështjesh të sigurisë", tha kryeministri i Maqedonisë. sa/

Foto: MIA