Shkup, 25 gusht 2023 (MIA) -  Ministri i Shëndetësisë, Fatmir Mexhiti, u takua sot me përfaqësues të disa shoqatave të shoqërisë civile - "ESE", "HERA", Iniciativa për të Drejtat e Grave nga Shuto Orizare dhe Shoqata për mbështetjen e personave që jetojnë me HIV "Bashkë më të fuqishëm". 

Siç citohet në kumtesën me shkrim të Mexhitit, po forcohet bashkëpunimi mes Ministrisë dhe shoqatave të shoqërisë civile, me fokus të veçantë kujdesin shëndetësor parësor dhe parandalimin.

"Qëllimi është që programet parandaluese dhe kurative të Ministrisë të mbulojnë nevojat më specifike të kategorive të cenueshme të qytetarëve, siç janë personat me sëmundje malinje, kujdesi shëndetësor aktiv për nënat dhe fëmijët dhe tema të tjera aktuale për mbrojtjen e kategorive të cenueshme të qytetarëve", citohet në kumtesë.

 Bashkëpunimi i përbashkët synon përmirësimin e procesit të konsultimit me sektorin civil, "veçanërisht me target grupet e prekura gjatë planifikimit dhe përgatitjes së programeve, përfshirjen aktive të organizatave të shoqërisë civile në ofrimin e shërbimeve për grupet e qytetarëve në nevojë, si dhe një proaktivitet më të madh të shoqatave në monitorimin e nevojave të këtyre personave". sa/

Foto: Ministria e Shëndetësisë