Teheran, 8 tetor 2024 (MIA) - Mbi qytetin iranian Isfahan gjatë natës janë aktivizuar sistemet për mbrojtje kundërajrore, njoftoi sot Garda revolucionare e Iranit.

Disa shpërthime gjatë natës kanë shkaktuar shqetësime për një sulm të mundshëm izraelit, raportoi DPA.

Agjencia iraniane e lajmeve Fars, duke cituar një burim në Gardën Revolucionare, njoftoi se sistemet e mbrojtjes kundërajrore reaguan pasi kanë vërejtur një "objekt me shkëlqim".

Sipas raportit, kjo nuk ishte një stërvitje e planifikuar dhe nuk kishte asnjë kontakt armiqësor.

Radioja shtetërore e përshkroi atë si një manovër mbrojtëse.

Më pak se një javë më parë, Garda Revolucionare Islamike, forcat elitare ushtarake të Iranit, gjuajti rreth 200 raketa në drejtim të Izraelit. Sulmi erdhi pas një serie vrasjesh të drejtuara nga Izraeli të figurave kyçe në rrjetin e aleatëve joshtetërorë të Iranit.

Izraeli bëri të ditur se do të hakmerrej.

Qyteti i Isfahanit, me arkitekturën e tij Persiano-islamike, konsiderohet si një nga destinacionet turistike më të njohura në vend. Në qytet gjithashtu janë të sistemuar objekte të rëndësishme nga industria e mbrojtjes dhe programi bërthamor i vendit. mb/

Foto: MIA