Shkup, 21 maj 2025 (MIA) - Aleanca për Shqiptarët (ASH) vazhdon të jetë pjesë e Qeverisë, pasi shumica dërrmuese e funksionarëve vazhdojnë të shkojnë në punë. Këtë e deklaroi zëvendëskryeministri Arben Fetai në emisionin “Klik plus” në TV 21, sipas të cilit dorëheqja e vetëm disa individëve nga pozicionet e tyre dhe e Arben Taravarit nga Ministria e Shëndetësisë nuk e çon ASH-në në opozitë.

"Pjesa e ASH-së në Qeveri përbëhet nga rreth 50 funksionarë shtetërorë të emëruar në pozicione të caktuara, të paktën 50, ndoshta edhe më shumë. Shoh që prej tyre, vetëm tre deri tani kanë dhënë dorëheqje, për tre dihet se janë deklaruar publikisht, për të tjerët nuk di dikush është larguar nga Qeveria. E di që të gjithë të tjerët vazhdojnë të shkojnë në punë", thotë Fetai.

Zëvendëskryeministri Fetai i cili është kryetar i Kuvendit të Aleancës për Shqiptarët e quajti cirk mbledhjen e kryesisë së partisë të mbajtur pikërisht për këtë çështje. Ai thotë se nuk i ka thënë “jo” Arben Taravarit, por “jo” një plani që sipas tij nuk është plan i Aleancës për Shqiptarët.

"Thash 'jo' një vendimi që nuk është vendim, sepse nuk mori formën e një vendimi në organet e partisë. Si pikë e parë, ai nuk ishte takim i udhëheqësisë, por një format i sajuar ku morën pjesë anëtarë të udhëheqësisë së partisë, zyrtarë dhe udhëheqës të degëve. Ky format nuk ekziston askund në statutin e partisë. Asambleja e partisë është organi i vetëm përgjegjës për marrjen e vendimeve të tilla në ASH. Prandaj vendosa të mos legjitimoj cirkun”, ka thënë Fetai.

Ai thotë se nuk e mbështetën Taravarin sepse, siç deklaroi, "ai vendosi të shkojë me BDI-në”.

Foto: printskrin