Shkup, 17 janar 2026 (MIA) - Drejtoria për të ardhura publike (DAP) informon se vazhdimisht bashkëpunon me institucionet kompetente në të gjitha rastet kur ekziston dyshimi për veprim joligjor në fushën e taksave, duke theksuar se në lidhje me rastin aktual që ka të bëjë me 11 të punësuar, DAP është në bashkëpunim të vazhdueshëm dhe të plotë me prokurorinë, duke siguruar dhe dorëzuar dokumentacion të plotë, materiale dhe sqarime eksperte në lidhje me rregulloret dhe procedurat tatimore.

Konstatimet dhe gjetjet profesionale, të marra nga kontrollet e kryera, thuhet në deklaratën e DAP-së, paraqesin bazë për veprim nga autoritetet e tjera kompetente.

"Drejtoria për të ardhura publike thekson qartë se nuk ka kompromis kur bëhet fjalë për sjellje joligjore, abuzim ose korrupsion. Këto fenomene janë të papranueshme dhe plotësisht në kundërshtim me parimet profesionale dhe etike të institucionit. Në të njëjtën kohë, DAP beson se në të gjitha procedurat parimi i prezumimit të pafajësisë duhet të respektohet vazhdimisht, si një garanci themelore në rendin juridik", informon DAP.

Ndërkohë, derisa zgjat procedura, DAP njofton se janë marrë masa me kohë dhe të përshtatshme për të siguruar funksionimin e qetë të institucionit dhe stabilitetin e proceseve të punës në njësinë e prekur organizative. Këto aktivitete mundësojnë vazhdimësinë në operacione, mbrojtjen e interesit publik dhe ruajtjen e integritetit institucional.

"Drejtoria për të ardhura publike mbetet e përkushtuar ndaj sundimit të ligjit, sjelljes së përgjegjshme dhe profesionale dhe mbrojtjes së interesit publik. DAP vazhdon të bashkëpunojë me të gjitha autoritetet kompetente me qëllim vendosjen e përgjegjësisë aty ku ekziston, por edhe për të ruajtur reputacionin, besimin dhe integritetin e institucionit dhe punonjësve të tij", thuhet në kumtesën e Drejtorisë për të ardhura publike. bsh/

Foto: MIA arkiv