Shkurt, 24 shkurt 2023 (MIA) - Zëvendëskryeminisri për Çështje Ekonomike, Fatmir Bytyqi është i gatshëm të bisedojë me përfaqësues të industrisë së furrave që kërkojnë nga shteti t'i subvencionojë pagat e furrtarëve, në të kundërt ata paralajmërojnë shtrenjtimin e bukës.

Bytyqi thotë se për të nuk ka arrdhur një kërkesë e tillë por se është i gatshëm për bisedë me të gjitha degët ekonomike.

"Vlerësoj se sikurse të gjitha kërkesat e tjera, duhet biseduar me të gjitha degët e ekonomisë, por vlerësoj se shteti nuk mund të jetë partner i subjekteve afariste. Ne mund të ndihmojmë në kohëra të vështira, por apriori dhënia e deklaratave që kanë karakter kërcënues se në qoftë se nuk e bëni këtë, do të kalojmë në një tjetër moment, vlerësoj se është e papërshtatshme dhe se nuk është në frymën e asaj që e kemi ndërtuar viteve të kaluara", deklaroi Bytyqi para fillimit të ngjarjes së sotme të organizuar nga Agjencia e Kadastrës së Patundshmërive.

Përkujtoi se industria e furrave subvencionohet në pjesën e energjisë elektrike, por se vetëm një pjesë e subjekteve të kësaj industrie e kanë përmbushur atë që është premtuar për t'i ulur çmimet.

"Dhe tani pyetja është nëse duhet marrëveshje e re xhentëlmene ose duhen rregulla të reja në vendosjen e tregut", tha Bytyqi.

Lidhur me çmimet e produkteve ushqimore në markete që nuk janë ulur plotësisht, Bytyqi tha se ka ulje të çmimeve, por jo në masën e parashikuar. Ai thotë se nuk është menjëherë pro masave radikale dhe heqjes së subvencionit për energjinë elektrike dhe se duhet të dëgjohen argumentet e kompanive që nuk e kanë bërë atë që e kanë premtuar. “Nëse argumentet nuk janë në anën e tyre, atëherë jemi të gatshëm ta anulojmë subvencionin”, thotë Bytyqi.

Ka ulje të çmimeve të produkteve ushqimore, shton ai, por jo në masën që prisnim dhe do të diskutojmë se cilat do të jenë hapat e ardhshme të Qeverisë. "Asnjëherë nuk duam të themi se cili është momenti radikal – nëse diçka që kemi dhënë, duhet ta heqim menjëherë. Ne duhet ta dëgjojmë anën tjetër pse e bën atë. Nëse do të ketë argumente nga ana e tyre, do t'u japim edhe një periudhë kohore shtesë, por nëse nuk ka argumente, jo vetëm që jemi gati të heqim subvencionin, por mendoj se janë paratë e qytetarëve dhe duhet të gjejmë një mekanizëm për t'ua kthyer ato para qytetarëve", tha Bytyqi.

foto: Qeveria