Shkup, 14 shkurt 2025 (MIA) - Maqedonia e Veriut, Mali i Zi dhe Shqipëria kanë shanset më serioze për t'u bërë vende anëtare të BE-së deri në vitin 2030, konsideron ambasadori i Lituanisë Eduardas Borisovas. Ai sot në takimin me kryetarin e Kuvendit, Afrim Gashi, theksoi se Lituania angazhohet për zgjerimin e BE-së me Ukrainën dhe Moldavinë, por se është jashtëzakonisht e rëndësishme që procesi i zgjerimit të përfshijë vendet e Ballkanit Perëndimor, bazuar në parimin e meritave, dhe që ata të bëhen anëtarë të BE-së sa më shpejt të jetë e mundur.

Gashi në takim, siç informoi shërbimi për shtyp i qeverisë, ka shprehur urime me rastin e 16 shkurtit, Ditës Kombëtare të Rivendosjes së Lituanisë, me urimet e sinqerta për një Republikë të Lituanisë të fortë dhe të begatë. Ai shprehu mirënjohjen për mbështetjen e vazhdueshme që vendi ynë merr nga Lituania për anëtarësimin e tij në BE, si dhe për gatishmërinë e tij për të ndarë përvojën e tij në këtë rrugë. Në kohën e sfidave serioze gjeopolitike dhe ekonomike në Evropë dhe në botë, ai shpreson për mbështetjen e mëtejshme të Republikës së Lituanisë për integrimin e Republikës së Maqedonisë së Veriut dhe vendeve të tjera të Ballkanit Perëndimor në Bashkimin Evropian.

Bashkëbiseduesit ranë dakord se marrëdhëniet bilaterale midis dy vendeve po zhvillohen në frymën e mirëkuptimit të ndërsjellë dhe të vullnetit për intensifikimin e mëtejshëm. Duke marrë parasysh hartën gjeopolitike dhe zhvillimet e reja në skenën botërore, ata arritën në përfundimin se procesi i zgjerimit të BE-së duhet të trajtohet më shumë si çështje sigurie sesa si çështje integruese. ls/

Foto: Kuvendi i RMV-së