Бахреин, 27 февруари 2025 (МИА) - Седумкратниот светски шампион Луис Хамилтон денеска изјави дека неговиот прв месец како возач на Ферари „не можел да биде подобар“ и дека полека се поврзува со болидот пред првата трка во Формула 1 во Мелбурн.

Хамилтон беше втор во генералниот пласман на вториот ден од предсезонските тестирања во Бахреин денеска, со заостанување од 0,031 секунда зад првопласираниот Карлос Саинц од Вилијамс.

Британецот го заврши утринскиот дел од тестот на првото место.

-Често е многу важно како ќе започнете. Последниот месец не можеше да помине поинаку и не можеше да биде подобро. Секој ден беше значаен и се работеше за градење на темелите. Иако моравме да направиме многу во краток временски период, не избрзавме. Долги денови, но затоа сме тука, мислам дека ќе се исплати во иднина. Тоа ќе се развие, беспрекорно е, лесно во однос на приближувањето до тимот. Не морав да го форсирам тоа, се чувствувам како дома, изјави Хамилтон, пренесе Скај.

Хамилтон е во Ферари од оваа сезона, по изненадувачкото заминување од Мерцедес, со кого освои шест од седумте шампионски титули.

Тој беше прашан дали мисли дека концептот на овогодинешниот болид на Ферари е подобар за него во споредба со оној што го возеше во Мерцедес минатата година.

-Мислам дека е малку рано да се каже, но навистина уживам во автомобилот. Мислам дека полека се поврзуваме. Вчера беше така-така, беше во ред. Но, ги поминавме сите планови за возење, тестираме многу работи. Не ги менувам поставките или не насочувам каде сакаме автомобилот да оди, а денес навистина возев и уживам во автомобилот, рече 40-годишниот Хамилтон.

За прилагодување на разликите во болидот на Ферари, Хамилтон рече: „Ова се денови за истражување. Има уште простор за понатамошно истражување, малку по малку, барам уште малку. Сите поставки се толку различни, дури и стисокот на сопирачките. Не се откажувам од она што го научив, но го учам овој нов начин на работа и начинот на кој треба да се вози овој автомобил бидејќи е различен и тоа е забавно“.

Последниот ден од тридневниот тест на патеката Сахир е закажан за петок.

Шампионатот во Формула 1 започнува на 16 март со Големата награда на Австралија во Мелбурн. дс

Фото: Архива