Белград, 1 јануари 2025 (МИА) - Србија ќе купи напредни артилериски системи и беспилотни летала од израелската компанија Елбит системс во голема зделка вредна 335 милиони долари, јавува денеска израелски Хаарец.

Србија е на врвот на трката во вооружување со нејзиниот балкански сосед Хрватска - која припаѓа и на НАТО и на Европската унија, а српскиот претседател Александар Вучиќ се пофали дека новите системи се дури и подобри од американските системи што ги купи Хрватска.

Според Вучиќ новите аквизиции ќе и овозможат на Србија да одговори на секој предизвик, вклучително и на оние „кои мислат дека имаат предност пред“ Србија.

Купувањето дојде во време на затоплување на израелско-српските врски кои вклучуваат меѓусебна продажба на оружје.

Во соопштението, Елбит рече дека добил договор во вредност од 335 милиони долари за обезбедување на ракетниот фрлач со долг дострел PULS, како и беспилотните летала Хермес 900, со испорака во следните три и пол години. мс/

фото: МИА архива