Брисел, 17 март 2025 (МИА) – Повеќето членки на Европската унија одлучија да одат по пат кој е катастрофален и може да предизвика „трајна пропаст“ на економијата и безбедноста на континентот, изјави денеска во Брисел унгарскиот министер за надворешни работи Петер Сијарто по состанокот на Советот за надворешни работи на ЕУ.

Сијарто на прес-конференција рече дека состанокот повторно бил „екстремно провоен и проукраински“ и дека голем број учесници „слепо инсистирале на продолжување на војната и речиси итно пристапување на Украина“ во ЕУ, соопшти унгарското Министерство за надворешни работи.

Тој оцени дека предлогот според кој ЕУ би потрошила 20 милијарди евра за испорака на оружје за Украина е „невиден“ и дека Унгарија се спротивставила.

- Унгарија не сака да учествува во таква иницијатива бидејќи има интерес за мир кој е поблизок од кога било, рече Сијарто и го поздрави почетокот на мировните преговори за Украина меѓу САД и Русија.

- Унгарија, се разбира, не го поддржува овој предлог и ние не сме подготвени да учествуваме во него. Нема да дозволиме парите на унгарскиот народ да се трошат за понатамошна испорака на оружје и со тоа да го продолжиме конфликтот, рече Сијарто по состанокот на министрите за надворешни работи на ЕУ.

Тој на Фејсбук објави дека Унгарија нема да се согласи на никакви чекори за пристапување на Украина во ЕУ додека не се вратат правата на унгарската национална заедница во Закарпатија.

Во Брисел се одржа состанок на Советот за надворешни работи на ЕУ, на кој се разговараше за војната во Украина, односите ЕУ-САД, ситуацијата на Блискиот Исток, Иран и Сирија. јт/

Фото: Сијарто на Фејсбук скриншот