Штип, 25 декември 2024 (МИА) - Tрета година по ред Општина Штип доделува стипендии и награди на најуспешнте ученици од општината. Градоначалникот на Општина Штип, Иван Јорданов денеска изјави дека ваквите признанија се со цел да се мотивираат учениците и да бидат насочени кон тоа да се стремат за уште поголеми успеси.

-Општина Штип трета година по ред ги стимулира, мотивира и наградува учениците, кои што имаат посебни достигнувања на државни и меѓународни натпреварувања, а се од нашиот град. Навистина еден гест кој што се надевам дека ќе ги мотивира да влезат со уште поголеми успеси во следната учебна година, затоа што ова можеби не значи многу, но верувам дека ќе биде една мотивација да продолжат по патот, по кој што чекорат. Посакувам догодина да се зголеми финансискиот износ за поддршка на успешните ученици, кои што верувам дека во своето образование ќе бидат успешни, изјави Јорданов.

Соња Николова од Општина Штип истакна дека фактот што годинава е поголем бројот на пријавени ученици во однос на претходна година докажува на тоа колку тие посветено работат на своите успеси.

-Радува фактот што оваа година имаме дури 67 кандидати, односно пријавени ученици на јавниот повик, кој што го објави Општина Штип. Бројот некаде за 20 тина ученици е зголемен од претходната година, што укажува и докажува дека проектот е на вистинскиот пат, односно ја постига своја цел, а тоа е промовирање на воспитно- образовните цели. Инаку, бројот годинава изнесува 16 ученици кои што добиваат распоредени во три групи на износ за доделување на стипендии, вели Николова.

Првата група на ученици, кои добиваат парични месечни награди добиваат 3.000 денари, за втората група добива 2.500, а третиот износ е 2.000 денари.

Доделувањето на стипендиите на учениците се одржа во Општина Штип, на кој присуствуваа ученици, нивните родители, претставници од локалната самоуправа. вдј/дма/

Фото: МИА