Lisbonë, 9 tetor 2025 (MIA) - Presidenti i Asociacionit evropian të futbollit (UEFA), Aleksandar Çeferin, në samitin e futbollit në Portugali, vlerësoi madhështinë e sulmuesit të Al-Nasrit dhe të reprezentuesit portugez, Kristiano Ronaldo.

"Mendoj se ai është padyshim përfaqësuesi më i madh i Portugalisë në botë. Nuk kam parë kurrë dikë kaq të motivuar. Ai nuk dëshiron të ndalet, dëshiron të vazhdojë të luftojë. Arritjet e tij janë mbresëlënëse. Mendoj se do të na duhej një bisedë dy orëshe për të shpjeguar gjithçka. Kam respekt të madh për të si person dhe futbollist dhe e dimë se sa vepra bamirësie bën. Ai është një nga tre futbollistët më të mëdhenj të të gjitha kohërave", tha Çeferini për "O Jogo".

40-vjeçari Ronaldo kaloi kufirin e një miliard eurove me vazhdimin e fundit të kontratës me Al Nasrin në vlerë pak më pak se 360 ​​milionë euro.

"Blumberg" e vlerëson pasurinë e Ronaldos mbi 1.2 miliardë euro, duke e bërë atë futbollistin e parë në histori që tejkalon shifrën e një miliard eurove fitime.

Kristiano Ronaldo, në ceremoninë e “Çmimeve portugeze të futbollit 2025” dy ditë më parë, deklaroi se nuk ka plane afatgjate dhe ende nuk e di nëse do të luajë në Kupën e botës 2026.

Foto: EPA