Shkup, 17 shtator 2024 (MIA) - Zëvendëskryeministri i parë dhe ministri i Mjedisit Jetësor dhe Planifikimit Hapësinor, Izet Mexhiti ka takuar dje shefin e ri të Delegacionit të Bashkimit Evropian në Shkup, Mikalis Rokas.

“Ishte kënaqësi e veçantë të takoja shefin e ri të Delegacionit të Bashkimit Evropian në Maqedoninë e Veriut, Mikalis Rokas, të cilit i urova mirëseardhje të përzemërt, dhe një mandat të suksesshëm në vendin tonë. Ky takim na ofroi një mundësi të shkëlqyer për të thelluar më tej marrëdhëniet midis Maqedonisë së Veriut dhe Bashkimit Evropian. Nënvizova se integrimi i vendit tonë në familjen evropiane, mbetet prioriteti ynë strategjik dhe më i rëndësishmi”, është shprehur Mexhiti.

Mexhiti, siç njofton MMJPH, më tej është shprehur se takime të tilla janë thelbësore për forcimin e bashkëpunimit tonë dhe për nxitjen e reformave që na ndihmojnë të përmbushim standardet dhe pritshmëritë e BE-së.

“Gjatë bisedës sonë, diskutuam gjerësisht çështje që prekin zhvillimin e vendit, me fokus të veçantë në situatën politike dhe ekonomike, në vend. Një tjetër pikë kyçe e diskutimeve tona ishte përqendrimi te politikat e mjedisit jetësor, me theks të veçantë tek nismat për mbrojtjen e mjedisit dhe përballjen me sfidat mjedisore, si dhe roli i rëndësishëm i BE-së në përmirësimin e këtyre proceseve. Diskutuam gjithashtu mundësitë për mbështetje financiare dhe teknike nga BE-ja për projektet tona zhvillimore dhe reformat e nevojshme, me fokus në projekte konkrete që lidhen drejtpërdrejt me Ministrinë e Mjedisit Jetësor. Avancimi i reformave dhe zbatimi i legjislacionit për mjedisin, në përputhje me standardet evropiane, u theksuan si prioritet absolut!”, është shprehur mes tjerash Mexhiti. bsh/