Shkup, 28 shkurt 2024 (MIA) - Duke qenë se jemi në një vit zgjedhor për zgjedhjet presidenciale në prill-maj të këtij viti, detyrë shtesë e Qeverisë është organizimi dhe përgatitja e parakushteve që zgjedhjet të jenë të lira, korrekte dhe demokratike. Kushtetuta e Republikës së Maqedonisë së Veriut nuk e njeh termin teknik "i përkohshëm", përndryshe Kushtetuta e njeh Qeverinë e Republikës së Maqedonisë së Veriut me të gjitha kompetencat që i ka.

Këtë, siç informoi shërbimi për informim i Qeverisë, e theksoi kryeministri Talat Xhaferi në intervistën e sotme për "Report Tv" në Tiranë, ku prej sot gjendet në vizitë pune, ndërsa foli edhe për çështjet aktuale për rajonin, botën dhe në Republikën Maqedonisë së Veriut.

I pyetur për ndjenjën e të qenit kryeministër i parë shqiptar në Qeverinë e Republikës së Maqedonisë së Veriut, siç qëndron në kumtesën e Qeverisë, e theksoi ndjenjën e përgjegjësisë ndaj vendit.
 

"Unë jam kryetari i parë i Kuvendit dhe aktualisht kryetari i parë i Qeverisë së Republikës së Maqedonisë së Veriut, me atë që edhe më e herët e kam theksuar ndjenjën e përgjegjësisë për sfidat që dalin nga obligimet dhe detyrat që i ka kryeministri gjatë udhëheqjes së vendit", u përgjigj Xhaferi.
 

Në intervistë, Xhaferit iu parashtrua edhe pyetja kur do të vijë koha për presidentin e vendit, me ç’rast ai shprehu pritshmërinë se do të ketë ndryshim në perceptimin e përkatësisë etnike, duke i dhënë rëndësi prezantimit të qytetarëve dhe të vendit në përgjithësi.

Xhaferi në intervistë ka trajtuar edhe disa çështje aktuale për Republikën e Maqedonisë së Veriut, ndër të cilat edhe rëndësinë e Planit të rritjes për Ballkanin Perëndimor të Komisionit Evropian.

"Samiti i nesërm është vazhdim i samitit të mëparshëm në Shkup, një muaj më parë, pra është vazhdimësi e punës që duhet ta përfundojmë si përfaqësues të vendeve të Ballkanit Perëndimor, në drejtim të harmonizimit të vlerave dhe parakushteve për anëtarësimi në BE. Dhe në çdo rast, për këtë do të debatohet edhe për tema që kanë të bëjnë me tregun e përbashkët europian, tregun e përbashkët rajonal dhe tema të ngjashme ekonomike, nga fusha e tregtisë", deklaroi kryeministri Xhaferi.

Ai vlerësoi se ajo që për herë të parë në rajon mbahet një Samit për Ukrainën, është konfirmim për rolin e diplomacisë ndërkombëtare të Republikës së Shqipërisë. Në këtë drejtim, Xhaferi sugjeroi edhe për rëndësinë e deklaratës që ai dhe presidenti ukrainas Volodimir Zelenski do ta nënshkruajnë në emër të Republikës së Maqedonisë së Veriut dhe Ukrainës. fc/

Fotografia: Qeveria e RMV-së