Shkup, 4 dhjetor 2025 (MIA) - Me fjalime hyrëse të mbrojtjes sot në gjykatën e Idrizovës vazhdon gjykimi për zjarrin në diskoteken "Puls" në Koçan, në të cilin humbën jetën 63 persona, përfshirë fëmijë dhe mbi 200 u lënduan.

Pasi të gjithë të pandehurit deklaruan në seancën e mëparshme se nuk ndihen fajtorë për veprat për të cilat akuzohen, prindërit e të ndjerëve sot vendosën një banderolë para gjykatës me fytyrat e të gjithë 63 fëmijëve që humbën jetën në zjarrin në diskoteken "Puls", duke thënë se ishte shumë kontradiktore që asnjë nga të pandehurit nuk e pranoi fajësinë.

"A duhet ne prindërit t'ua kujtojmë se pse janë në sallën e gjyqit? Asnjëri prej tyre nuk kishte asnjë grimcë ndërgjegjeje dhe njerëzimi për të pranuar fajin e tyre. Dhe të gjithë e dimë se kush është fajtor dhe shpresoj se do të marrim drejtësi për fëmijët tanë", tha një nga nënat.

Seanca e sotme e gjyqit mund të ndiqet drejtpërdrejt në MIA Youtube dhe MIA Facebook.

Avokati i të pandehurit Xhevair Kamberi nga Ministria e Ekonomisë në rastin "Puls", tek i cili javën e kaluar u tha se se janë gjetur 13 telefona celularë dhe një laptop, e informoi Gjykatën se pronari i vërtetë i pajisjeve ishte gjetur dhe identifikuar dhe kërkoi që Gjykata të kontaktojë Burgun e Shkupit për ta verifikuar këtë.

Para fillimit të seancës së sotme, para Gjykatës folën edhe disa nga përfaqësuesit e tjerë ligjorë të palëve të dëmtuara, të cilët deklaruan se po i bashkohen ndjekjes penale dhe po njoftojnë një kërkesë pasurore.

Një pjesë e tyre shprehën ngushëllim ndaj familjeve të viktimave dhe theksuan se e kuptojnë aktakuzën, por nuk pranuan faj për "vepra të rënda kundër sigurisë së përgjihshhme". 

Në seancën e kaluar fjalime hyrëse dha mbrojtja e të pandehurit të parë, pronarit të diskotekës Dejan Jovanov, pronarit të MMMM Kafe, Mitko Stojanov, personit të sigurimit Stojanço Dimitriev dhe Grozdan Millkovski, pronar i objektit.

Një pjesë e të pandehurve në fjalimet hyrëse, e kontestuan bazën e aktakuzës. 

Avokatët theksuan se klientët e tyre nuk kanë ndërmarrë veprime që do të kishin lidhje të drejtpërdrejtë me ngjarjen tragjike, dhe se kanë poseduar dokumentacion të vlefshëm. Ata paralajmëruan nxjerrjen e provave dhe dëshmitarëve të cilët, sipas tyre, do të konfirmojnë se të pandehurit nuk ishin përgjegjës për zjarrin dhe se tragjedia është rezultat i lëshimeve institucionale dhe jo fajësisë personale.

Gjykimin e drejton gjyqtarja Diana Gruevska Ilievska dhe po zhvillohet nën masa të shtuara sigurie, me praninë e të pandehurve, të afërmve të viktimave, prokurorisë, mbrojtjes dhe gazetarëve të shumtë.

Prokuroria, e përfaqësuar nga një ekip prej 15 prokurorësh publikë, paralajmëroi se provat do të tregonin se klubi "Puls" ka qenë kurth vdekjeprurës që nga fillimi, rezultat i neglizhencës sistematike dhe lëshimeve institucionale.

Në bankën e të akuzuarve janë 37 persona - pronarë, menaxherë, inspektorë, ish-kryetarë komunash, gardianë dhe nëpunës shtetërorë. mb/

Foto: Arkivi i MIA-s